Pynbna u President barim ka NPP ban kyrshan ïa u kyrtong Congress ha elekshon MP

Shillong, Risaw 26 : U President barim ka National People’s Party (NPP) Dr. WR. Kharlukhi uba dei ruh ha kajuh ka por u MP barim ka Rajya Sabha, ha kane ka sngi Nyngkong u la pynbna paidbah ba un kyrshan ïa ka Congress bad ïa u kyrtong jong ka, u Bah Vincent H. Pala, ha kane ka elekshon MP shiteng samoi na Shillong.
Kane ka rai bad ka jingpynbna ba u Dr. Kharlukhi u shim ka dei hadien ar bnai thik ba u resain noh na ka NPP.
Haba kren bad ki lad pathai khubor ha kane ka sngi, u Dr. Kharlukhi u la ong ba hadien ba u la iehnoh ïa ka NPP, bun ki briew ki la kylli ïa u kaei kaba un leh hadien kane. U la ong ba lyngba kane ka jingïalang, u kwah ban pynbna paidbah ïa ka rai jong u.
“Kawei na ki daw ba nga rai ban kyrshan ïa ka Congress ka dei ka jingpyrshah ïa ka Foreign Contribution Regulation Amendment Bill 2026 (FCRA Amendment Bill),” u la ong.
U la ong, “Lada ka Congress kam shym la pyrshah ïa ka FCRA Amendment Bill ha ka dorbar Parliament kaba la dep, mynta kane ka Bill ka la lah ban kylla long aiñ.” U la pynpaw ruh ba ka Congress ka ïeng skhem ha ka nongrim pyrshah ïa ka FCRA Amendment Bill 2026 bad ka dawa ban weng noh pura ïa kane ka Bill.
“Nga la rai ban kyrshan ïa ka Congress bad ïa u kyrtong jong ka na Shillong Parliamentary Seat, u Bah Vincent H. Pala, namar nga la sngewthuh ba lada ngi kwah ban ïada ïa lade, ngi hap ban pynkhlaiñ ïa ka Congress,” u la ong.
U la bynrap ba lada ki paidbah ki sngewthuh shisha ïa ka jinglong jingman kaba ki ïakynduh mynta, ka jingdon jong u Bah Vincent H. Pala ha Parliament kan pynkhlaiñ ïa ka jingïakhun pyrshah ïa kane ka Bill.
U la ong ruh ba lada u Bah Pala u don ha Parliament, ka jingdon jong ki MP kiba pyrshah ïa kane ka Bill kan nang kiew, bad yn don sa uwei pat u nongmihkhmat ban ïakhun pyrshah ïa ka.