Kat kiba ïatreilang bad ka NPP ne ka BJP ki shah pynjah na ka saiñ pyrthei: Vincent Pala

Shillong, Risaw 26: U MP barim ka Lok Sabha na ka seng Congress bad uba dei ruh pat mynta u kyrtong jong ka Congress ban ïakhun ïa ka elekshon shiteng samoi na Shillong Parliamentary Constituency sha Lok Sabha u Bah Vincent H Pala u la ong ba u don ka jingngeit ba ki seng riewlum hapoh ka jylla kin ym duh noh, kumba la jia ïa ka seng United Democratic Party ha kaba jan baroh ki MLA jong ka, ki la phet noh.
“Ngi ruh na ka seng Congress ngi la mad ïa kane naba ka la don ka jingphet jong ki nongtrei, ki nongmihkhmat bad kiwei kiwei, hynrei ngi ïai trei beit la ka kam bad kajuh ka nongrim bad mynta ka Congress ka la sdang ban khie im biang, kumta ha ka jingsngew jong nga shimet, ki seng riewlum ha ka jylla kim dei ban jah noh bad kumba ka long mynta ka UDP ka la mad ïa kane ka jingeh, hynrei ngam tharai ba kan kut noh,” ong u Bah Vincent.
U la ong ba kum ka jylla kam dei ban duhnoh ka jingsngew ïa ki seng riewlum, watla ha Delhi donkam ia ki seng heh, hynrei ha ki jylla dang donkam ïa ki seng trai ri. “Haba poi sha ki elekshon jong ka jylla ki seng riewlum ki dang dei ban don bad kaba ma pat da ka jingthmu jong ka BJP ban pynlong beit tang kawei ka elekshon kan sa nang pynduna ia ka jingdon ki seng riewlum, kumta halor ka jingjied ïa ki MP sha Delhi pat donkam beit ïa ki seng kiba heh,” u la ong.
Halor ka jingshah pynduh noh jong kiwei pat ki party haba ki ïatreilang bad ka BJP kum ka Shiv Sena bad kiwei bad baroh kiba ïatreilang bad kane BJP suki suki ki shah pynjah noh, kumjuh ruh ha kane ka jylla Meghalaya, kiba ïatreilang bad ka NPP suki suki ki shah pynjah noh kumba long mynta ïa ka seng UDP.
“Kumta kam don kano kano ka jingïapher ki rukom treikam hapdeng ka BJP bad ka NPP bad lada pynkylla ktien ka NPP bad BJP ki long kajuh. Kumta ka BJP bad NPP ki don kajuh ka rukom pyrkhat,” ong u Bah Vincent.
Ha kawei pat ka liang u Bah Pala haba phai sha u MLA ka West Shillong u Bah Paul Lyngdoh uba la long teng u nongseng ka KHNAM, bad kumjuh ruh u nongïalam ba hakhmat jong ka United Democratic Party, u la ong, “U Bah Paul u la long kum uta u Sing ba la shah pynmong uba la long teng u Myntri ka sorkar bad u la shah siat teng ha la ka jong ka Party da u Khnam bad ka Ryntieh, nangta u la ïasoh sha ka UDP bad ha ka Bom u la lehbha kum u sing bad ngin ïapeit mynta ba u la leit ïasoh sha ka NPP la un ïoh ïa ka shuki Myntri hynrei lada ki jingkular kim urlong te ka lah ban ym poi shano shano ruh naba ka jingkyrmen kaba la angnud kam long kan long kum ki nongïalam ka TMC bad suki suki ki shu jah noh.”
U la ong ba ka UDP ka dang don ka jingïoh jingkyrshan bad ka nongrim ka dang khlaiñ bha ha ki shnong ki thaw. “Haba nga leit sha manla ki shnong ki thaw, ki district, bad ki constituency ka BJP kam pat lah ban ïoh ka jingshahniah na ki nongshong shnong hynrei ka UDP ka dang don ka vote bank bad lada don bad ka Congress bad ka UDP phi lah ban shim noh ïa ki nongïalam hynrei phim lah ban shim noh ïa ki nongthep vote kam long kaba suk naba ngi im ha ka jylla kaba rit bad nga ngeit ba ka jingsah marwei jong u Bah Metbah Lyngdoh kum u President ka UDP kan ym pynduh pyndam noh hynrei kan long kum ka Congress ha kaba mynta ka la kiew biang ha kaba ki la wan ki nongïalam ban ïasoh sha ka Congress,” ong u Bah Vincent Pala.
Halor kito kiba ïasoh sha ka seng BJP, u Bah Pala u la ong ba ka BJP barabor kam ju bat ne pynurlong ïa ki jingkular jong ki. “Kumba long ha Delhi, ki seng kiba rit, ki MP kiba dang thymmai bad kiwei kiwei, kin ym ïoh jaka ha Parliament naba ka BJP kan ym sngap ïa ki parti barit. Ngi la ju ïakren ïa ka ILP, la kren halor ILP, ka Ktien Khasi, bad kiwei kiwei, ka BJP kam sngap bad hangne ba mynta ki paidbah ka ri ki sngew ba la donkam biang ïa ka Congress,” ong u Bah Pala.
“Kumba la ïathuh da u Dr. W R Kharlukhi ba um ju ïashim bynta bad ki jingïalang jong ka National Democratic Alliance (NDA) naba um sngew myntoi bad kane ka jingpyrshah ka la ïaid naduh ba sdang bad don bun kiba ong balei u la iehnoh ïa ka NPP namar u sngewthuh ba ki jingpyrkhat jong u bad kiwei kam ïaid lang kumta ka bha ba iehnoh kam ym ban kynnoh ïa kiwei hynrei da la ka monsngewbha da lade,” ong u Bah Pala.