Shillong, Naitung 31: Ki paidbah ka jylla Meghalaya ha ka sngi U Blei ki la ai khublei khatduh ïa u Bah Robert Garnett Lyngdoh uba la ju bat teng kum u Myntri jong ka tnad Kam Poh Ïing ka jylla uba la khlad noh na kane ka sla pyrthei ha ka 29 taik hadien ba ka jingpang ka la ban ïa u la bun bun snem.
Haba ai jingkren khublei khatduh eh ïa la u Hymmen ka Dr Careen Lyndoh ka la ñiewt5ang ïa ki sngi jinglong khynnah mynba ki dang ïa rit. Ka Dr Careen ka la ong ruh ba kane ka jingduh noh jong ki ïa la u hymmen uba don hajan haman ki khep ba ki para ki donkam ïa ka jingai jingmut na u kan long ka ingduh kaba yn ym lah da mano mano ban pyndap.
“Kum u hymmen shynrang ïa ki hynriew ngut ki para kynthei i Bahbah bunsien i hap wanphai sha ïing da ka dur khmat kaba la mong bad ka khmut ba la phlei snam ha ka jingïashoh ban ïada la ki para kynthei” ong ka Dr Careen.
Ha kane ka sngi la sakhi ruh ïa ka jingwan ai khublei khatduh ym tang ka ki riew sain pyrthei hynrei ki khlieh nongïalam jong ki kynhun niam ba kynthup na ka niam Muslim, Hindu, Sikh, Budhist, ki nongïalam na ki kynhun balang khristan babun ryngkat ruh ki riew paidbah.
Kum u briew uba ieid ïa ka put ka tem ka rwai ka siaw, ki khun, ki khun, ksiew bad ki paralok nongrwai nongtem jong u Bah RG Lyngdoh ki la ai ka jingrwai kaba khatduh eh ïa la u paralok da ki jingrwai kiba ki ïa ju rwai lang mynba u dang don ha ka sla pyrthei. Ïa ka jingleh burom khatduh bad ka niam ka rukom ïa u Bah RG Lyngdoh la pyndep ha ka ïing sah jong u ha Nongrim Hilss kaba la pyndep da ka Balang Baptist hashuwa ban rah ïa ka met jong u ban thang ha Mawbah.
