Ym tang ka Sorkar hynrei ka Liang Pyrshah ruh ka leh Drama lang halor ka ILP: President KSU

Shillong, Naitung 31: U President rangbah jong ka KSU u Samla Lambokstarwell Marngar u la pynpaw ïa ka jingsngew bynñiaw halor ka jingbym pat ïoh ïa ka ILP ha lka jylla watla ka Ïing Dorbar Thaw Aiñ ka jylla ka la mynjur ïa ka Resolution ha ka 19 tarik Nohprah 2019.
Haba kren bad ki nongthoh khubor ha ka sngi Saitjain u Samla Lambokstarwell Marngar u la ong ka jingbym ïoh ILP ha ka jylla ka dei beit namar ka jingbym shimkhia da baroh ki dkhot ka Ïing Dorbar khamtam eh ka sorkar jylla ban kham leh khor halor ka jingdawa ILP ha ka jylla.
Haba la kylli pat halor ka jingleit dawa ki Nongïalam bad ki MLA ka TMC ha Delhi halor ka MoU khappud ba dei ban pyndam noh ïa ka MoU pynbeit pud kaba la ïasoi hapdeng ka jylla Meghalaya bad Assam bad ka jingdawa ba ka sorkar India ka dei ban ithuh ïa ka ktien Khasi bad Garo ha ka Khyrnit Baphra ka Riti Synshar ka ri India bad ka jingbym kren eiei pat jong ki halor ka ILP u Samla Lambokstarwell u la ong “Ki juh ki briew kiba mynjur ïa ka resolutiomn hjalor ka ILP bad dei ki juh hi ki briew kiba ym kren halor ka ILP ka pyni ba ki la nguid ïa ka prie kaba ki la khlei mynba ïatai ïa ka Resolution ha ka Ïing Dorbar Thaw Aiñ ka jylla”
“Kane hi ka pyni ïa ka jingbym shimkhia ym tang ka sorkar hynrei wat ka liang pyrshah ruh bad ka jingmynjur jong ki ïa ka resolution ban dawa ILP ka dei tang ka drama” ong u Samla Lambokstarwell.
U Samla Lambok u la ong ruh ba ka jingbym ïoh ILP ha ka jylla ka dei namar ki don ki briew jong ngi hi kiba ym kwah ba ka ILP ba kan trei kam ha ka jylla ba sa ïoh shim kabu ka sorkar India.
U Samla Lambokstarwell u ong ruh ba ka jingbym ïoh ILP ha ka jylla ka dei beit namar ka jingbym shimkhia jong ka sorkar bad ki dkhot ka ïing dorbar thaw aiñ hi baroh kawei ban pynbor ïa ka sorkar India ba kan ai ILP ha ka jylla.
Shuh shuh u la ong ruh ba ha ka jingshisha ki MLA baroh 60 ngut ban leit Delhi ban pynthikna ban pynïoh ILP ha ka jylla.