134 ngut ki nong Rajasthan ki ïohkam nurse bad tang 15 ngut na ka jylla Meghalaya: MPCC

Shillong, Risaw 23: Ka Meghalaya Pradesh Congress Committee ha ka sngi Thohdieng ka la dawa ïa ka jaka pule doktor bad kaba dei ruh ka jaka sumar nongpang ka NEIGHRIMS ba kan pynneh ïa ka bhah kam ki nursing officer kaba dei ban long 80% ka bhah na ka bynta ki nurse kynthei katba 20% ka bhah na ka bynta ki nurse shynrang.
Haba kren sha ki lad pathai u President ka Block Congress Committee jong ka Laitlumkhrah u Bah Eugene Jarain u la ong ba baroh kiba pang na kane ka thaiñ ki shaniah tylli ha kane ka jaka sumar bad hadien ba la plie ha u snem 2005-06 ka jingdonkam ïa ki nurse katba nangmih ki por ka la long haduh 5-600 ngut kiba trei nurse lah donkam.
U la ong ba kane ka jingdonkam kaba 80 la 20 ka bhah kam ka long kaba kongsan ban pynneh ïa ka jinglong barieh, ka kyrdan ka burom jong ki kynthei ki khynnah bad ki longkmie bad na ka liang ka AIIMs ruh ka bat ïa kane ka rukom bhah kam.
U la ïathuh ruh ba hadien katto katne snem ba la plie ïa kane ka jaka sumar ka la don ruh ka jingbhah kam kaba long 70 la 30 ratio hynrei kaba sngewkhia bha ka long hadien ba la pynlong ïa ka jingthung kam lyngba ka NORCET ha u snem 2023 ba haduh 90% kiba ïoh kam nursing officer ki dei ki shynrang bad tang 10% dei ki kynthei bad kane kala pynkhuslai bad ïohi ba kane kadei ka jingma ïa ki nongpang.
“Kine ki 90% ki dei kiba na Rajasthan bad 10% pat ki dei na Meghalaya kiba pass lyngba ka NORCET exam ngi kyndit ïa kane kumta ka Congress kan saphah da ka representation sha ka Ministry jong ka sorkar pdeng ba khmih ïa ka koit ka khiah bad ka party ka la kynduh ruh ïa u MP jong ka u Saleng Sangma bad ha ka 27 tarik mynta u bnai ha ka jingïalang yn sa pynpaw lut ïa kine ki jingsngewkhia,” ong u Bah Eugene.
Katba u Bah Banphira Basaiawmoit President ka Mylliem Block Congress Committee u la ïathuh ba ha shwa ban pynlong ïa ka eksam nurse lyngba ka NORCET ha u snem 2019 ka jinglait ki kam ha NEIGHRIMS ka long 231 tylli katba kiba ïohkam ki long 111 ngut na Rajasthan bad 85 ngut na Meghalaya bad hadien ba la pynlong ïa ka eksam da ka NORCET ha u 2023 kiba shah thungkam ki long 134 ngut na Rajasthan bad na Meghalaya ki long tang 15 ngut lyngba ka nongrim jong ka merit bad kane kadei hi ba ki duna palat ki jaka ai Coaching ïa ki nurse ha jylla katba ha Rajasthan pat manla ki kyndong kynshrot ki don beit ki jaka ai jinghikai pyntbit kumta ki la lah ban leh bha.
“Ka jingdon jong nurse shynrang ka la mih ka jingkynnoh ba ka don ka jingtrei torti, ka la lah don ruh ka jingshah ujor FIR, ka la don ruh ka jingjia ba shah ktah kti I khynnah rit bad kam don ruh ka jingsngew sngaiñ bad sngewsuk lada don tang ki nurse shynrang bad kumba long mynta ha kane ka jaka sumar manla ki tnat la don tang ki nurse shynrang, watla kam long beaiñ, hynrei lyngba ka riti dustur ruh ym pat lah ban pdiang,” ong u Bah Banphira.
U la ong ruh ba ka la don ka jingpynsngew da ki Staff Nurse ba lah bun ki shynrang kiba trei, kumta ka Congress ka kwah beit ïa ka bhah kaba 80:20 namar kane ka bhah ka la don ruh ha kiwei ki jaka sumar kum ka AIIMs.
“Kaba lyngngoh ka long ba u Director ha ka Instagram post u la ong ba ka NEIGHRIMS kam dei ka jaka sumar ba la ithuh bha ne kaba long kongsan ha ka ri ne National Importance ym pat lah ban leh ïa ka 80:20 ratio. Hynrei katkum ka article 15 (3) ngi lah ban buh bhah kyrpang katkum ka jingsngaiñ jong ki kynthei. Kumta ngi kwah ba kane ka jaka pule bad sumar ha ki por ban wan ban pynkylla noh sha ka 80:20 namar ha kine ki 5 snem ban wan kin sa don ki nurse ki ban sa shongthait bad kan sa mih biang ka eksam lyngba ka NORCET bad ka lah ban don bun biang kiba trei ki male nurse na Rajasthan ki ban ïoh kam bad kin duna biang kiba napoh kane ka jylla,” u la bynrap.