Hadien bymïohi ïa ki dak ki shin pynkynmaw biang ka KSU ïa CM halor ki jingdawa ha NEIGHRIMS

Shillong, Risaw 22: Ka Khasi Stident Union (KSU) jadien ba kala dep ban ïa kynduh bad u Myntri Rangbah ka jylla u Conrad K Sangma ha ka 26 tarik u bnai Nailar mynta u snem, mynta ka sngi kala leit ban aiti ïa ka shithi pynkynmaw ha u Secretary jong u Myntri Rangbah halor ka mat jingdawa ha kaba ïadei bad ka NEIGHRIMS.
Haba kren sha ki lad pathai khubor u samla Pynshaiborlang Rani uba dei u Assistant General Secretary ka KSU seng kmie u la ong, Kane ka jingwan mynta ka sngi ka long ban pynkynmaw ïa u Myntri Rangbah haba ïadei bad ka mat jingdawa jong ka NEIGHRIMS.
Kum ban shu kdew ba ha ka shi tarik u Jymmang ka KSU 2025, ka seng ha kato ka pork ala pynlong ïa ka jingïakhih ha phyllaw jong katei ka jaka ai jingsumar halor kiba bun bah ki mat bad hadien kane ka jingïakhih, ka sorkar jylla lyngba u Myntri sorkar u la wan ban kynduh ïa ka seng ban ïa kren bad ban ïa pynbeit ha kaba ïadei bad kine ki mat ba ka seng kala ïakhih hangtei ka jaka.
Na kane ka jingïakhih, “ka sorkar kala ai ka jingkular ba kan shim khia ha kaba iadei bad kine ki mat jingdawa jong ka seng, kiba kala buh ha kaba iadei bad ka NEIGHRIMS” ong u samla Pynshai.
U Samla Pynshai u la ong, “Halor kane ka jingkular ka seng ha ka 5 tarik u Jymmang ka seng kala sangeh shipor ïa ka jingïakhih bad hadien kane kala ïaid ki bnai bad kip or bad kam shym pat la pyni kino kino ki kam ba la shim khia da ka bad hadien ka jingïai ap jong ka seng napdeng kine ki mat jingdawa ba ngi la buh kham mynshwa halor ki 15 tylli ki mat jingdawa bad kawei na ki kadei halor ka NEIGHRIMS”.
“Ha kane ka mat jingdawa ba ka seng kala buh, ngi la ioh ban kynduh bad u Myntri Rangbah ha ka 26 tarik u bnai Nailarmynta u snem bad na ka liang u Conrad K Sangma u la kular ba un long uta u nongbtin lynti ban ïarap ban pynïakynduh hapdeng ka KSU bad ka Ministry jong ka tnad ka koit ka khiah, hynrei hapdeng jong kine kiei kiei baroh kat haduh mynta ngi iohi bana ka liang jong ka sorkar pat ai kano kano ka dak kumba ngi la ïa kren” ong u samla Pynshai.
Shuh shuh u la ong, Kane ka jingwan ban ai ïa kane ka shithi ka long ban pynkynmaw sa shisien ïa u Myntri Rangbah ba u dei ban shim khia mardor ïa kine ki mat jingdawa namar ba ngi sngewthuh ba wat lada ka NEIGHRIMS kadei ka hospital ba peit da ka sorkar India hynrei kane ka hospital kaba heh ha North East ka don ha ka jylla Meghalaya bad ngeit ruh ba ka sorkar jylla ka don ruh ïa la ka jong ka iktiar bad ban ïa kren bad pynbeit bad ka sorkar kmie halor ki kynrum kynram.
Shuh shuh u samla Pynshai u la ong, ki don ki nongialam ka seng kiba la ai copy ruh ha kaba ïadei bad ki mat jingdawa sha Director jong ka NEIGHRIMS u Dr Nehlin Mehta namar ba katkum ka jingtip ba kan don ka Govering Council la 26 mynta u bnai, te kaei ba ngi kwah ban ong ba….kata ka govering council jong phi kan iaid sha khmat hynrei na ka liang jong ka seng ka ong sngewbha ai bad pyntrei kam shwa ïa kine ki mat jingdawa.
Ki mat jingdawa ka KSU kaba nyngkong kadei halor ka thung kam thung jam 80-20 kaba mut 80 % na ka bynta ki Kynthei bad 20 % ba ka bynta ki shynrang ha kaba ïadei bad ka kam nurse, kawei ban ai bhah kyrpang na ka bynta ki samla trai ri kiba dei ki ST jong ka Jylla Meghalaya bad ha kaba iadei bad ka rta wad kam namar ba baroh shi katta ki ai 35 snem hynrei mynta kila ai noh tang hapoh 30 snem ïa ki samla wad kam wad jam.