Ym shym la pynlong ïa ka public hearing halor kane ka Shillong Ropeway Project: Secy JAC

Shillong, Risaw 22: Ki dkhot ka Joint Action Committee (JAC) Ropeway Project mynta ka sngi kila mih noh jyndat na State Convention, Shillong na ka jingialang kaba la khot da ka Jngoh kai pyrthei, da kaba pyrshah ïa ka Dorbar Shnong ba ki khlem pynlong ïa ka Public Hearing halor ka Shillong Ropeway Project.
Kham ha shwa ki heh ophisar ka tnad jngoh kai pyrthei kila ai jingpynshai lut ha kaba iadei bad ki jingbit ba kila ioh na ki tnad bapher bapher kynthup na ki tnad trei kam jong ka sorkar kmie halor kaneka project.
Hadien ba la ioh sngew ïa ka jingai jingmut na ka sorkar, Ka Secretary jong ka JAC ba pyrshah ïa ka Shillong Ropeway Project, Dr L Marbaniang kala ong, “Ym shym la pynlong public hearing halor kane ka bynta ne ka project”.
Ki dkhot jong ka JAC kila mih jyndat da kaba pynpaw ha ka jingialang ba tang khyndiat ngut eh na ka Dorbar Shnong kam shym mut pat ba kan don ka public hearing.
U Bah C.V.D. Diengdoh IAS, Commissioner Secretary ka tnad jngoh kai pyrthei u la batai haba ïadei bad kane ka skhim kaba la sdang ban saindur ha u snem 2012 bad dei ha u snem 2019 ka sorkar kala shim ïa ka rai ban pyrshang ban pyntreikam ïa kane ka Ropeway ha u Lum Shyllong.
Kaei kaba la don ha ka jingmut jingpykhat, la kan ktah ne em ïa ka um hato ka pynjaboh ne em ïa ka lyer bad ban pynlong ïa ki jingiamir jingmut haba ïadei bad kane ka Ropeway bad dei ha u snem 2021 la pynkhreh ïa kane ka skhim.
Dei ha u snem 2022 la pynlong ia ka jingiamir jingmut bad ki paidbah bad hadien kata ha u snem 2023 la iasoi ïa ka dulir la ioh ïa ka NOC wat na ki shipai suin bad na ki shipai ryngkew dei ha u snem 2024 la dep ban pynkhreh ïa ka skhim.
Ban shna ïa kane ka Ropeway la ioh ïa ka jingmynjur wat na ka tnad khlaw jong ka sorkar pdeng dei ha u snem 2025 la ai ïa ka jingbit ban trei bad ha u snem 2026 mynta u snem la ai ïa ka jingbit ban shna ïa ki ïing ban sdang ïa ka Ropeway na kjat Laitkor Peak sha Madan Laban ha ka jinglut na ka bynta kane ka Ropeway ka long T.151/-klur tyngka.
Hadien ba la dep ban pynshai na ka liang u Commissioner Secretary ka tnad jngoh kai pyrthei, u Secretary ka Raid Laban u la pyntip ba la khot ïa ka jingiamir jingmut haba ïadei bad kane ka Ropeway hynrei na ka liang ka Joint Action Committee hapoh ka jingialam ka Dr. Lida Marbaniang kala ong ba ka dorbar Raid Laban kala thok namar khlem khot ïa ka jingpynsngap paidbah bad la kyrpad ban pynsangeh shwa ïa ka jingialang bad khot pat ha kawei ka sngi hynrei khlem da sngap ïa ka jingkren kala mih jyndat noh na ka jingialang.
Ha kane ka jingialang kila don katto katne ki riew rangbah kiba la buh ïa ki jingkylli ha kaba iadei bad ka um, ka lynti syngkien ka surok ïa kane ka jingkylli la pynshai da ki ophisar ka tnad jngoh kai pyrthei da kaba pyni ïa ki map ba kan nym ktah ïa ka um namar ka Ropeway kam dei ha u Lum Shyllong hynrei ka long na kjat u Lum Laitkor Peak sha Madan Laban.