Ki samla pule ba kwah ban pynïaid ïa ki kam lajong kila kiew da 16.2 percent ha u snem 2025

Shillong, Risaw 22: Palat iwei na ki phra ngut ki samla pule kolej na India ki la dep ban sdang ïa ka kam khaïi, kaba ïahap bad ka jingkheiñ kyllum ha ka pyrthei baroh kawei, ong ka kaiphod jong ka GUESSS India 2025 ba la pynmih da ka IIT Mandi.
Ka jingwad bniah ha ka ri baroh kawei ïa ki 25,783 ngut ki samla pule na palat 1,200 tylli ki jaka pule ha kylleng ki 34 tylli ki jylla bad ki UT ka la lap ba 43 na ka 100 ngut ki samla pule ki kwah ban sdang ïa ka kam – kumjuh kum ka jingkheiñ kyllum ha ka pyrthei. Napdeng kito kiba sdang, 35.5 percent ki la dep ban kamai na ka jingdie man ka por, kaba la kham bun ban ïa ka 33 percent ha ka pyrthei.
Ka kaiphod ba la thoh da u Dr Puran Singh bad u Prerak Sharma bad ba la pyllait paidbah ha ka ISBACON 2026 ha Mohali dangshen, ka pyni ïa ka jingkylla kaba shai bha ha ka jingsngewtynnat ïa ka kam. Ki samla pule kiba kwah ban pynïaid ïa la ka jong ka kam tang hadien ba la dep pule ki la kiew na ka 14 percent ha u snem 2023 sha ka 16.2 percent ha u snem 2025, katba kito kiba kwah ban ïoh kam sorkar ki la hiar na ka 12.7 percent sha ka 10.1 percent.
Ka jingsngewtynnat ia ki kam jong ki kompeni heh ruh ka la hiar na ka 31.3 percent sha ka 27.4 percent.
Ki nongseng samla pule India ki kham kloi ban leh bad pyrshang biang. 31 percent na ki kam kiba don ka jingdie man ka por la seng tang ha u snem 2025 (ha ka pyrthei: 18 percent) 41 percent ki nongseng ki la khang ïa ka kam kaba kham mynshuwa bad sdang biang (ha ka pyrthei: 33 percent) bad 42 percent ki pynïaid ar ne palat ki kam (ha ka pyrthei: 25 percent).
“Ki samla pule jong ka ri India ki don ka jingangnud kumba long kiwei pat ha ka pyrthei, bad kito kiba sdang ki shna ïa ki kam ba shisha kiba la thung kam ïa ki briew,” ong u Dr Puran Singh, u nonghikai ba ïadei bad ka School of Management, ka IIT Mandi bad u Country Delegate, ka GUESSS India.
Ki jinglap ki pyni ba ka IT, AI bad ka digital ka dei ka plan kaba kham pawnam, hynrei tang kawei na ki shiphew tylli ki kam ba ïaid ka dei ka digital. Ki samla pule kiba don ki nongseng ha ka circle jong ki, ki kham lah ban sdang lai shah.
Ka kaiphod ka la pynpaw ruh ïa ki jingduna – shiteng na ki samla pule na India kim tip ïa u nongseng kam seng jam nalor ki kmie ki kpa, tang 10 percent na ki nongseng kam seng jam kiba dang thymmai ki la die nyngkong (23 percent ha ka pyrthei), bad katba ki kynthei ki thmu la jan katjuh kum ki shynrang, tang 45 percent na ki kynthei kiba kwah ban long kam seng jam ki la sdang pyrshah ïa 53 percent na ki shynrang.
Ïa kane ka jingpule la pynlong bad ka skulbah REVA, Bengaluru kum ka nongïatreilang jong ka ri.