Shillong, Risaw 22: U Bah Kitborlang Jarain uba la iehnoh ïa ka kam kum u President jong ka National People’s Youth Front jong ka 17th North Shillong, kaba dei ka seng ki samla jong ka seng National People’s Party (NPP) u la leit ban rung noh kum u dkhot jong ka BJP ha kaba ïa kane la pdiang sngewbha ruh da u Nongaiktien ba rangbah jong ka BJP u Bah Mariahom Kharkrang.
Katkum ka kyrwoh ba la phah da u Bah Kharkrang u la ong ba ka jingwan pynïasoh jong u Bah Kitboklang Jarain kan nang pynshlur ïa kiwei pat ki samla ban pynïasoh sha ka seng BJP na kane ka constituency bad ka jylla baroh kawei.
Ha kawei pat ka liang u Bah Kitboklang Jarain ha ka 16 tarik mynta u bnai u la phah ïa ka shithi iehnoh kam sha u President bad Secretary ka 17th North Shillong BEC, Meghalaya ha kaba u la pyntip ba u la iehnoh na ka kam kum u President ka NPYF na kane ka constituency.
Ha ka shithi u Bah Jarain u la ïathuh ba ka jingiehnoh kam jong u ka dei hi na ka daw shimet bad ong ba um kwah ba ka jingbym don shuh jong u kan wanrah ka jingbym sngewsuk bad ki jingeh ïa ka party NPP ban pynïaid ïa ki kam bad ki jingkitkhlieh.
U la ong ba u pynpaw ka jingsngew burom ïa ka party NPP ba ka la ai jingshaniah ha u bad ban ai ha u ka lad ban shakri kum u President ka Youth wing jong ka constituency ha kine ki snem ba la leit katkum ki jinglah jong u.
“Nga pynpaw ka jingai khublei ïa ki jingkyrshan, ka jingïatreilang bad jingïasngewthuh jingmut ha ki por ba nga dang trei ïa ka kam bad nga kyrmen ba ka party kan bteng ban trei khambha hapoh ka constituency jong ngi, ha ka imlang sahlang bad ha ka jylla baroh kawei bad nga kyrpad ba phin pdiang ïa kane ka jingiehnoh kam jong nga bad ka kyrmen bad kwah ba ka party kan bteng ban ïoh ki jingjop ha baroh ki kam ki ban sa wan,” ong u Bah Kitboklang Jarain ha ka shithi iehnoh kam.
