Jowai, Risaw 20: Ka Krishi Vigyan Kendra (KVK), Jaiñtia Hills, ha ka jingïatreilang bad ka tnad ka rep ka riang ka jylla, ka Agricultural Technology Management Agency (ATMA bad kiwei de ki tnad treikam kin sa pynlong ïa ka Khet Bachao Abhiyan naduh ka 22 tarik u Risaw haduh ka 30 tarik u Naiwieng, 2026, ha kylleng ki jaka jong ka West bad East Jaiñtia Hills District.
Ka jingthmu jong kane ka prokram ka long ban leit pynsngewthuh sha ki nongrep ka thaiñ halor ki rukom rep katkum ka juk bad ka jinglong ka suiñbneng katkum ka jaka, ka jinglong jingman jong ka khyndew, khnang ba ka kam rep kan neh sah bad kan pyndap pynbiang ïaka bam ka dih.
Shuh shuh ha kane ka prokram yn ai jinghikai kyrpang sha ki nongrep ha manla ki shnong bad kin ïoh jingtip shaphang ka rukom rep tynrai, ka rukom pynmih ïa ki symbai, ka jingïada ban lait na ka jingshah lynshop mariang, ka jingpynlong ïaka sboh dawai nalor kiwei kiwei de. Ha kaba yn sam ruh ïa ki kot lyngkdop, ki jingbatai bniah lyngba ki kor Digital.
Lyngba kane ka prokram bala pynlong daka KVK Jaiñtia Hills bad kiwei de ki tnad treikam kan long ka jingmyntoi kaba khraw eh ai ki nongrep hapoh ka West bad East Jaiñtia Hills.
Halor kane la khot ïa baroh ki nongrep ka thaiñ, ki kynhun (SHG) bad ki seng jong ki nongrep ha kylleng ka District ban ïashim bynta shitrhem ha kane ka prokram, khnang ban pynkiew ïa ka rep ka riang ha baroh ki liang.
