Kynthoh jur ka ECC bym lah ka ophis DC bad SP EJHD ban tehlakam jingpynmih tdem pathar ki karkhana coke

Khliehriat, Naitung 31: Ka Environment Coordination Committee, ka la lap ba ka karkhana saiñ dewiong, ka coke kaba don ha shnong Umtrya kaba la long trai da ka kong Santa Mary Shylla, ka la pynmih tdem pathar “Watla ki paidbah ki la ud bad iam hynrei ki trai coke ki leh bym patiaw, ki coke kiba don ha Umtyra ki thang dusmon bad pynmih tdem pathar la kum ban pyniap syndon ïa ki paidbah”ong u kyrwoh.
Na ka liang u Legal Adviser u bah Reading War bad u Secretary ka ECC u bah Pynbait Sutnga, ki la ong ruh ba “Ha ka jingshisha ka Meghalaya State Pollution Control Board, ka la dep pynmih da ka hukum naduh ka 23 tarik u nohprah 2020 kaba la hukum ïa baroh ki coke kiba la ïoh ïa ki Consent To Operate (CTO) ba ki dei ban bud ïa ki kyndon kiba long katkum ka hukum jong ka National Green Tribunal, hynrei ka sorkar kam patiaw eiei ïa kane, watla na ka liang ka ECC man la ka por ka la ju leit mih sha ophis u Deputy Commissioner Eeast Jaiñtia Hills District, hynrei la sngewthuh ba na ka liang u Deputy Commissioner ruh um lah ban ai ka jingiada ïa ki paidbah kiba shah ktah ha ka tdem kaba mih na ki coke, ka ECC ka lyngngoh shi katdei eh ban iohi ba u Deputy Commissioner bad u Superintendent of Police jongka district kiba dei hok ban ai ka jingiada bad kiba la pynkhamti ban peit ïa ka im la iap jong u paidbah kim nud ban leh eiei, ngin nai iakren ïa ki ‘lei san snem namar ki tip tang ban kjit ïa ka jingim u paidbah da kaba shu leh mynleh hok tang ha ka por shwa ka election” ong u kyrwoh.
Haba kren halor ka jingbym nud u Deputy Commissioner bad u Superintendent of Police ka East Jaiñtia Hills District ban leh eiei ïa ki karkhana coke kiba pynmih tdem pathar, ka ECC ka kynnoh ba imat kane ka don kaei re kaei sha lyndet, ka ECC ka pynpaw ruh ka jingsngew lyngngoh halor ka jingong u myntri rangbah ka jylla, u Conrad Sangma, uba la kren kop ba ym don shuh ki coke beaiñ
“Kane ka dei ka ba ym lah shuh ban tip ka ei ka ba long beaiñ lane bym long beaiñ, ka sorkar MDA ka la bakla lut khamtam ha kaba ïada ïa ka hok jong ki paidbah ka East Jaiñtia Hills District khamtam ha kaba ïadei bad ka jingshah ktah ka mariang bad wat kito ki jingthung, ki phlang ba la wan thung da u myntri sorkar, u James Sangma ha shnong Narwan ruh mynta ki la iap lut na ka daw ka jingjur ka tdem na ki coke” pynpaw ka ECC ha ryngkat ka jingsngew khia kaba khraw namar ka jingpynmih tdem pathar ki karkhana coke kiba don hapoh ka district kiba buh jingma haduh katta katta ïa ka koit ka khiah jong ki paidbah.