Lah jan don arphew saw kynta ka jingdheng kali ha surok NH-6 ha Malidor-Ratacherra

Khliehriat, Naitung 31: Na ka daw ka jingsniew palat ka surok, kawei ka trok ka la kylla ha surok ha Malidor, kumta sa shi sien pat ki paidbah nongleit nongwan kiba ïaid lyngba na ka surok National Highway na Ratacherra, malidor bad Sonapur, East Jaiñtia Hills District ki la shah ktah biang ha ka jingdheng kali kaba jur bha kaba la jan don mynta ar phewsaw kynta, namar ka jingdheng kali ka la sdang naduh mynnin mynmiet ha ka por kumba 9 baje mynmiet bad kat haduh ba thoh ïa kane ka khubor ki kali ki dang lait suki suki haduh mynta janmiet por kumba 6 baje janmiet.
Ha kane ka jingdheng kali, baroh ki kali kynthup ki kali heh bad ki kali rit ki la sahkut lut, ki don ruh shibun ki kali kiba wan na kiwei kiwei ki jylla ruh, kum na Assam, Manipur,Tripura, Mizoram bad kiwei kiwei kiba iaid lyngba na kane ka national highway ki la sahkut ha ka jingdheng kali
Watla ki kali ki la lait ban ïaid suki suki, hynrei ki nongleit nongwan ki dang don hapdeng ka jingartatien namar ka jinglong jingman ka surok national highway ha Narpuh ka dang buh jingeh ïa ki kali kiba ïaid na kane ka surok bad ha kano kano ka por ka lah ban jia ka jingdheng kali.