Ki jaiñ kim dei tang ka jingpyni ïa ka pateng; ki long ka nongrim ka jingtei ka ïoh ka kot jong ka India (Pabitra Margherita)

Naduh ka jingsyaid ki Pashmina Kashmir haduh ka jingthaba itynnad ki Muga silk jong ka Assam, naduh ki jingsaiñdur ba itynnad jong ka Rajasthani Bandhani haduh ka jingsaiñdur ba itynnad bad ba ïaineh jong ka Kanjeevaram silk, ka jingïar jong ka India ha ka jaka bad ka kolshor ka long kaba im, kaba itynnad. Mynta, ïa kane ka imlang sahlang kaba ym da lah ban ïanujor la lum lang hapoh kawei ka rynsan kaba ïatylli. Katba ka Bharat Tex 2026 ka dang plie ïa ki jingkhang jong ka ha ka Bharat Mandapam ba pawnam ha New Delhi, kaba sdang naduh ka 14 tarik haduh ka 17 tarik Naitung, ka wanrah ïa ka jingïar ba itynnad jong ka ri jong ngi ha kawei ka jaka.
Ki jaiñ kim dei tang ka jingpyni ïa ka pateng jong ngi; ki long ka nongrim ba pura jong ka jingtei jong ka ïoh ka kot jong ka India. Ka kam ka dang long ka kor kaba khraw jong ka jingroi bad ka jinglong mar ryngkat, kaba noh synniang 2.3% sha ka GDP, 13% sha ka jingpynmih mar ha ki karkhana, bad 8.6% sha ka jingshalan mar shabar ri. Kum ka nongai kam kaba ar ha ka India hadien ka rep ka riang, ka pynneh ïa palat 100 million ngut, ka pynkhlaiñ ïa ki shnong ki thaw ha ki jaka nongkyndong bad kaba ai jinglaitluid ha ki kam pisa tyngka na ka bynta ki million ngut ki kynthei ha ka ri baroh kawei.
Ban sngewthuh shisha ïa kane ka kam ba donbor ha ka ioh ka kot, dei ban sngewthuh ïa ka Bharat Tex. Ka dei ka jaka jong ka India khaïi jaiñ kaba thikna, kaba pawnam ha ka pyrthei baroh kawei, kaba la saiñdur khnang ban pyni ïa ka jingshna jaiñ kaba pura bad ka jingkhlaiñ jong ngi sha ka pyrthei baroh kawei. Ka long kum ka ïew kaba pura kaba pdiang ïa ki nongshna mar hapoh ka ri, ki pavilion jong ki jylla, ki nongpyni tiar nabar ri, bad ki nongthied na kylleng ka pyrthei hapoh kawei ka rynsan, kaba plie lad ïa ka jingïoh ïa ki mar kiba kordor, ka jingïadei bad ki kompeni, bad ka jingpyni ïa ki mar ha ka rukom kaba khlem pat ju jia mynno mynno ruh.
Haba nga pyrkhat shaphang ka jingïaid lynti jong kane ka sienjam kaba heh, ka pynkynmaw ïa nga ïa ka jingsngew sarong bad jingshai kaba khraw kaba la wanrah da ki artylli ki bynta ba mynshuwa jong ka Bharat Tex. Haba u Myntri Rangbah duh ka ri u Narendra Modi u la ai jingkren sha ki briew kiba don bynta ha ka kam ba ïadei bad ki jaiñ ha ka bynta kaba la dep jong ka Bharat Tex, u la sakhi ïa u symbai uba ngi la thung mynta u la nangroi stet bha sha u dieng banyan. U la ong ba kane ka jingpyni kaba heh kam rakhe tang ïa ki riti dustur ba riewspah jong ngi hynrei ka pyni ruh ïa ki lad ki lynti kiba khraw jong ka ri India kaba la kiew bha. Ka jingjop kaba khraw jong artylli ki bynta ba nyngkong, kaba la khring ïa ki nongthied nabar ri kaba ym pat ju jia mynno mynno ruh bad kaba la pynmih ïa ka jingïatreilang kaba khraw, ka la buh ïa ka nongrim kaba khlaiñ. Ka jingshem jong nga shimet ha ka por jong ka Bharat Tex 2025, kaba la sakhi ïa ki jingïakren ba jur hapdeng ki sorkar bad ki kam khaïi bad ki sorkar ba la pynkylla sha ki jingmih kiba lah ban ïohi ka la pynskhem ïa ka jingkhmih lynti kaba bha na ka bynta ka lawei bad ka la pyni ïa ka jingshaniah kaba nangkiew ha ka pyrthei ha ki bor ban pyntreikam jong ka India. Kane ka bynta kaba lai ka rah shakhmat ïa kata ka bor, kaba pynkylla ïa ka lad kaba nyngkong sha ka jingkhlaiñ ba pura ha ka kam karkhana.
Ka jingheh jong ka jingïalang mynta u snem ka pyni ïa ka rukom treikam karkhana ba la peit bniah. Ka kynthup ïa ki exhibition hall ba la buh kyrpang ha Bharat Mandapam, ka exhibition ka pyni ïa ka jingkyntiew pura ïa ka kam ba ïadei bad ki jaiñ kynthup ïa u fibre, ki ksai, ka jaiñ, bad ka jingpyniriam, ki jaiñ na ka bynta ki ïing, ki technical textile, bad ki karkhana ba ïadon bynta lang. Palat 1,600 ngut ki nongpyni ïa ki tiar ki ïashim bynta, kiba wanrah ïa ka bor pynmih mar ha ka thaiñ beit beit sha ka rynsan ha ka pyrthei ban pyni ïa ka jingthmu 5F jong u Myntri Rangbahduh Modi kaba wanrah jingkylla: Farm to Fibre to Factory to Fashion to Foreign. Da kaba pynïasoh lang ïa ka jingkyntiew ïa ki kam baroh kawei ha kawei ka jingïaid lynti jong ka kam, kane ka jingïalang ka pyni ïa ka bor jong ka India ban shaniah halade ban pynïaid ïa man la ka kyrdan shna tiar ha ka rukom tynrai.
Ka rukom peit jong ka pyrthei ïa kane ka la long kaba phylla. Ha kane ka bynta la pyni ïa ki nongpynitiar na ki ri bapher bapher na ki 14 tylli ki ri kynthup ïa ka ri America, ka ri Bilat, Japan, Portugal, Spain, New Zealand, South Korea, South Africa, bad Nepal, ryngkat bad ka jingmihkhmat kaba khlaiñ jong ki jaka treikam na ka United Nations bad ka European Union. Ki kynhun Myntri bad ki nongmihkhmat jong ki kam khaïi kiba ha khlieh duh na ki katto katne ki ri ki ïashim bynta ban wad ïa ki jingïatreilang kiba jrong samoi. La khmih lynti ba ka jingpyni kan khring palat 7,000 ngut ki nongthied na palat 110 tylli ki ri kiba la pynrung kyrteng bad 1.3 lak ngut ki nongwan thied ha ki saw sngi, baroh ki ïashim bynta bad palat 20,000 tylli ki jain kiba la pyni. Ïa kane ka kam khaïi yn pynskhem da palat 3,500 tylli ki jingïalang ba la pynbeit ryntih hapdeng ki kam khaïi, ryngkat bad ki State Investor Connect Session kiba ai ïa ki jylla jong ka India ka rynsan ban pyni ïa ki jingdon jingem jong ki kiba kyrpang kiba ïadei bad ki kam karkhana.
Ka jinglong nongïalam ha ka kam karkhana ka donkam ïa ka jingaiti kaba jylliew ha ka jingnang jingstad bad ka jingthmu na ka bynta ki por ban wan. Ka Bharat Tex 2026 ka pynskhem ïa kane ka jingkitkhlieh lyngba ka Global Textile Dialogue, kaba kynthup ïa palat 100 tylli ki jingïalang ba la pynkhreh kynthup ïa ki jingïakren jong ki kynhun, ki roundatable, ki masterclass, ki jingïalang jong ki jylla, ki jingïalang ai khusnam, bad ki workshop. La ïalam da palat 370 ngut ki CXO na kylleng ki ri bad na ka ri, ki nongthaw polisi, bad ki nongsaiñdur thymmai, kine ki kam ba la pynkhreh kin pynleit jingmut ha kaba pynheh ïa ka Khaïi pateng bad ka Jingbei tyngka, ban kyntiew ïa ka Teknoloji bad ka Jingsaiñdur thymmai, bad ban kyntiew ïa ka jingpyniriam bad ka Jingtrei kti. Ka jingïalang kan sakhi ruh ïa ka jingsoi bad jingpynbna ïa ki katto katne ki jingïatehkular ba kongsan bad ki kaiphod jong ki kam ha kylleng ka kam khaïi pateng, ka jingbei tyngka, ka teknoloji, bad ka jingïatreilang jong ki jaka treikam.
Ka jingthmu kaba kongsan jong kine ki jingïamir jingmut ka long kaba la aiti ha ka nongrim ba kongsan jong ka Jingïaineh bad Ka Jingïahap. Ha ka bynta ba ladep, u Myntri Rangbahduh u la pynpaw ba ka imlang sahlang ha ka pyrthei ka nang pdiang ïa ka jingthmu jong ka ‘Fashion for Environment’ bad ba ka jingpynneh pynsah ka la long barabor ka bynta kaba kongsan jong ka pateng jong ki kam jong ka Bharat kiba ïadei bad ki jaiñ. Kane ka bynta jong ka Bharat Tex ka pynkylla ïa ki jingeh jong ka mariang ha ka pyrthei sha ka lad kaba khraw, kaba pyni kumno ki jingsaiñdur thymmai ki pynkylla ïa ki buit tynrai jong ngi ban pyndonkam bha ïa ki jingdon jingem bad ban pynduh ïa ki jaboh jabaiñ, kaba ai jingmyntoi beit beit ïa ki nongthaiñ jaiñ bad ki nongtrei kti jong ngi. Hapoh ka jingïalam jong u Myntri ba dei khmih ïa ka Tnad Textiles, u Giriraj Singh Ji, ka Tnad ka la pynsted ïa kine ki sienjam ban pynthymmai bad ka jingkiew shaphrang kaba ïaineh, da kaba pynthikna ba ka jingkyntiew pura ïa ka kam jong ngi ba ïadei bad ki jaiñ ka ïoh jingkyrshan da ka teknoloi kaba katkum ka juk mynta, ki polisi kiba lah ban pyniar, bad ki jingïadei kiba khlaiñ bad ki ïew ki hat.
Ka jingheh bad jingshaniah kaba paw lyngba ka Bharat Tex kadei ka jingmih beit beit na ki shiphew snem jong ka jingpynkylla ia ki polisi kaba iaineh hapoh ka jingïalam jong u Myntri Rangbahduh ka ri u Narendra Modi. Ha kine ki 12 snem ba la leitnoh, ka Sorkar Modi ka la pynkhlain ia kawei pa kawei ka bynta jong ka jingkyntiew ia ka kam jain lyngba ki jingiarap kiba wanrah jingkylla. Ka skhim Production Linked Incentive (PLI) na ka bynta ka kam jain ka la khring ïa ki jingkular ban bei tyngka palat T.31,687 klur, kaba la wanrah ïa ka jingshna ïa ki jaiñ ba shna da ki briew ha ka rukom kaba heh,ki jain bad ka technical textiles katba ka pynmih ïa ki lad ioh kam ioh jam kiba bun. Ha kajuh ka por, dang kyntiew ia hynniew tylli ki PM MITRA Park kum ki jaka shna tiar ba la pyniasoh lang kiba pyni ia ka rukom treikam 5F kaba don jingthmu jong u Myntri Rangbahduh. Ka jingpynkupbor ia ki nongshong shnong ha ki jaka nongkyndong kalong kaba khlain kumjuh; lyngba ka Prokram National Handloom Development, la bei tyngka haduh T.2,000 klur ha kylleng ki 794 tylli ki kynhun shna jain, da kaba pynbiang ïa ki kor ba la pynbha sha ki 1.17 lak ki nongthaiñ jaiñ bad ka jingai jnghikai pyntbit sha kumba 90,000 ngut ki nongtrei, katba palat T.1,335 klur la pynbiang sha ka tnat shna jain hapoh ka National Handicrafts Development Programme. Shuh shuh, palat 1.5 lak ngut ki nongthaiñ jain ki la rung ha ka Government e-Marketplace (GeM), ha kaba ka Skhim MUDRA jong ki nongthaiñ jain ka la ai ram khlem da hap buh bynda sha jan 3 lak ngut ki nongïoh jingmyntoi. Da kaba pyniasoh ia ki nongshna, ki nongtrei kti, bad ki nongsaindur thymmai jong ngi beit beit bad ki iew ka pyrthei, kine ki jingpynkylla ba bniah ki la pynkhreh ia ngi ha ka rukom shna na ka bynta ka jingkiew kaba khraw ha ka pyrthei kaba ngi iohi ha kane ka taïew.
Katba ngi dang peit kylleng ki jaka pyni tiar ba itynnad jong ka Bharat Mandapam, ka jingïohi jong ngi kam sahkut ha tang kane ka trade show. Kane ka jingïalang ka long kum u mawmer ba kongsan ha ka jingpynkhreh kam jong ngi na ka bynta Vision 2030 ban pynheh ïa ka karkhana shna jain jong ka India sha ka karkhana shna jain kaba haduh $350 billion ha ka pyrthei, ka jingïaid lynti kaba ïahap bha bad ka thong jong ka ri jong ka Viksit Bharat @ 2047. Nga khot sngewbha ïa baroh ban ïadon bynta lang bad ngi ha kine ki saw sngi ban wan ha ka Bharat Tex 2026 ban sakhi ia ka bor kaba khraw jong ki nongtrei jong ngi, ki jingpynwandur ba tbit jong ki nongsaindur jong ngi, bad ka lawei jong ka kam jain ha ka pyrthei, ba la saindur da ka jingsngew sarong, ba la shna ha ka rukom kaba lah ban iaineh, bad ba la pyniasoh lang ha ka jingheh ha India.

(U nongthoh u dei u Myntri Khynnah jong ka Sorkar Pdeng ba dei
khmih ïa ka Tnad Textiles. Ki jingthoh haneng kidei ki jingsngew
shimet jong u nongthoh).