Yn ïoh lahduh ba thymmai ka SSA Super Cup 2026

Shillong, Risaw 17: Ka SSA Super Cup kan ïoh ïa ka lahduh ba thymmai mynta u snem hadien ba ka Meghalaya Police Football Team ka la pynkhyllem noh ïa ka nongjop jong u snem 2025 ka Shillong Lajong da 1-0 kol ha ka jingïakhun semifinal kaba ar ha ka janmiet sngi Saitjaiñ ha SSA Stadium, Polo.
Ka MLP kan ïakhun pyrshah ïa ka Nongkseh ha ka phainal ha kane ka sngi Nyngkong ha ka por 5:30 janmiet, kaba mut ba kane ka lympung ïalehkai phutbol knockout kan ïoh ïa ka lahduh ba thymmai mynta u snem. Ha ka sngi Thohdieng ka Nongkseh ka la jop pyrshah ïa ka Mawlai da 1-0 ha ka semi ba nyngkong. Ban rung sha ka semi, ka MLP ka la hap ban pynliem ïa ka Langsning lyngba ka tie breaker ha ka jingïalehkai playoff ha kaba sdang jong kane ka taïew.
Haba phai sha ka jingïakhun, ka jingïatreilang hapdeng u Everestarly Rynjah (40′) bad u Rapborlang Marwein ka la ïarap ïa ka MLP ban thep ïa ka namtam jong kane ka jingïakhun. Kine arngut ki la trei borbah na ka bynta ka MLP ha ki jingïakhun ba la dep bad ka jingïatrei lang ka jong ki ka la seisoh biang ha ka ban pynpra ïa ka kut ba skhem jong ki rangïalehkai ba shadien jong ka liang pyrshah, ha kaba u Rapborlang u la don bynta ban pashat ïa ka bol na ka liang kamon kaba u Everestarly u la rung shakhmat ban pynïasoh tiak da ka khlieh.
Bad dei tang kane hi ka kabu ksiar ba thikna jong ka MLP ba ka la ïohlad, katba ha baroh kawei ka jingïakhun dei ka Lajong kaba la lah ban thaw bun ki lad ha ka kylla step bad kumjuh ruh ha ka kylla miet hynrei ym shym la don kawei ruh kaba seisoh.
Ka Lajong ka la hap ban sei madan katto katne ki rangïalehkai ba shakhmat ha ka kylla miet ban pynkhlaiñ ïa ka jingïalehkai hynrei wat kine ruh kim shym la lah satia ban pynkylla ïa ka jingïakhun, ha kaba u Eveningstar Bareh, nongapkol ka MLP ryngkat bad ki rangap dien ki la ïeng skhem sha bak ban nym ailad ïa ka Lajong haduh kaba kut.
Na ka bynta ka kol kaba u la thep ban pynjop, u Everestarly u la shah jied ban khur ïa ka khusnam T7 Player of the Match bad u la ïoh ruh ïa ka khusnam pisa na u President ka Meghalaya Football Association u Bah Hamletson Dohling.
Mynta baroh kin phaikhmat sha ka jingïakhun phainal, ha kaba baroh ar liang kin kyrmen ban buh ïa ka dak bad ban ïohrah ïa ka nam lahduh ha kane ka sienjam kaba ar jong ka Super Cup. Kaba kham sngewtynnad ka long ba baroh ar, ka Meghalaya Police bad ka Nongkseh ki la ïakhun ha ka SSA First Division ha u snem 2025, ha kaba ka Nongkseh ka la pyndep kum ka lahduh bad ka MLP ka la wan kyrdan ba ar; dei hadien kane ba ki la kiew kyrdan sha ka Shillong Premier League, ha kaba ki la wan ha ka kyrdan kaba lai bad kaba san.