Jop ka Wahiajer Narpuh SSC haka EJHDFA Super Division

Jowai, Risaw 17: Ka Wahiajer Narpuh SSC bad ka Khliehriat East YWSC ki la jop ïa la ki jong ki jingïalehkai ha ka lympung phutbol “Super Division” bad ka First Division League 2026 bala pynïaid daka East Jaiñtia Hills District Football Association (EJHDFA) kiba la long ha ka sngi Saitjaiñ (17 tarik Risaw) ha Artificial Diengshynrum, Khliehriat.
Haba phai sha ka jingïakhun jong ka 6th Kyrmen Shylla Contribution Trophy League Stage 2026 kaba dei ha ka kyrdan “Super Division”, ka kynhun ïalehkai jong ka Wahiajer Narpuh SSC kala pynliem noh da 4-1 ïaka R.Shkenshynriah SC.
Ka Wahiajer Narpuh SSC ka la lamkhmat ïa ka kylla step da 1-0 lyngba u Francio Sumer (8’), nangta ha ka kylla miet ka la pynjlan ar shah ïa ka jinglamkhmat hadien ba u Renaldo Rymbai jong ka R.Shkenshynriah, u la kum bakla thep hi sha kol lajong (own goal) ha ka minit kaba 55.
Watla katta ruh, ka R.Shkenshynriah ka la ïoh ban pynphai kawei na u Matthew Bareh haka minit ba 61 hynrei u Ailan Donald Pasleiñ (85’) bad u Meban Sumer (86’) ki la pynkhihjar mar shi sien ha ki khyndiat minit shuwa ban kut ban pynthikna ïa ka namjop khlem jingartatien na ka bynta ka Wahiajer Narpuh.
Katba haka jingïakhun jong ka Thomas Nongtdu Memorial Trophy kaba dei ka lympung First Division League 2026, la sakhi ïa ka Khliehriat East YWSC kaba la pynliem da 2-1 ïaka Ladrymbai B SC. Baroh ar tylli ki kol jong ka Khliehriat East YWSC la thep ha ka kylla step da u Kyntulang Nongwa (28 & 36’), nangta ka Ladrymbai B SC ka la pynphai kawei ha ka kylla miet lyngba u Amasjune Phawa (61’).
Da kane ka jingjop ka Khliehriat East YWSC kala ïoh ban rung sha ka ‘Quarter Final’ ha ryngkat ka Musniang SC naka Pool-A jong kane ka lympung ïalehkai 1st Division 2026.