Kynnoh u MDC ka Tura bym ïahab ka rukom sam jingïarap scholarship ïa ki samla pule ST

Shillong, Risaw 17: Da kaba kynnoh ba ki don ki jingbym ïahab ha ka rukom ai jingïarap bad sam ïa ki scholarship, u MDC ka Tura u Bernard Marak u la khot ïa ka sorkar jylla ban pynshai balei ba katto katne ngut ki samla pule ST ki ïoh duna ïa ka pisa ba la pan na ka skhim Umbrella Scholarship, katba kiwei pat ki la shah kyntait ban ïoh jingïarap watla ki dei hok ban ïoh.
“Ki jingujor ki la mih wat hapdeng ka jingpynbna jong u Myntri Rangbah ka Jylla ha kaba ïadei bad ka jingpyllait ïa ki scholarship. Katto katne ki samla pule na ki longïing kiba duk ha ka liang ka ïoh ka kot ki la kynnoh ruh ba la kyntait ïa ki aplikeshon jong ki, kaba la pynlong ïa ki ban ïaleh ban pyndap ïa ka bai rung skul, ka bai skul bad kiwei kiwei ki jinglut jingsep ha ka pule puthi,” ong u Marak.
Katkum ka jingong jong u MDC, ki samla pule bad ki bahaïing hasem jong ki ki la ïakynduh jingeh namar ka jingbym pyllait pisa, kaba la nang pynjynjar shuh shuh ïa ka pisa tyngka jong ki bad pynlong ïa ki katto katne ban ïaleh pyrshah ïa ka bai kolej bad wad ki lad ki lynti ban bteng ïa ka jingpule jong ki.
“Ngi kyntu ïa ki bor synshar jylla ban pynshai ïa ki kyndon ban mynjur bad kyntait ïa ki aplikeshon, ban batai ïa ki jingbym ïahap hapdeng ka pisa ba la pan bad ba la ai, bad ban ai ïa ki daw jong ki aplikeshon ba la kyntait,” ong u Marak.
U Marak u la khot ban pynmih ïa ki jingtip ba bniah jong ki aplikeshon ba la mynjur, ba la kyntait bad kiba dang sahteng, ban pynshisha ïa ki jingujor ha kaba ïadei bad ki jingsiew ba lyngkot, bad ban pyllait ïa baroh ki jingsiew kiba dang sah sha ki samla pule kiba dei hok khlem da pynslem shuh.
“Ki samla pule ki la ban jur ba ki jingpynbna scholarship ki dei ban pynkylla sha ka jingïarap pisa kaba biang bad kaba biang por, khamtam eh na ka bynta kito kiba na ki longïing kiba kham tlot ha ka liang ka ïoh ka kot kiba shaniah ha ka skhim ban bteng ïa ka jingpule jong ki,” la ban jur u MDC ka Tura.