Khur ka Meghalaya ar tylli ki khusnam ‘SKOCH Silver Award’ halor ka rep ka riang bad ka Lariti Cultural Centre

By Mawphor Editor On Oct 18, 2026

Shillong, Risaw 17 : Ka Meghalaya ka la khur ar tylli ki khusnam kiba kyrpang kiba long ka jingithuh ïa ka jingtbit treikam jong ka halor ki ar tylli ki tnad lyngba ka khusnam ‘SKOCH Silver Award’ halor ka jingpyrshang jong ka ban kyntiew ïa ka rep ka riang kaba lah ban neh bad ka jingpyntrei ïa ki jingtei kiba ïadei bad ka kolshor.
Ka State Biological Control Laboratory (SBCL) hapoh ka tnat Agriculture and Farmers’ Welfare ka la ïoh ïa ka khusnam na ka bynta ka projek kaba kyrteng ‘Bio-inputs Production Unit for Sustainable Agriculture: SBCL Meghalaya Initiative’, katba ka Directorate of Arts and Culture ka la ïoh ïa ka khusnam na ka bynta ka ‘Lariti Performing Centre, Mawkasiang’.
Ïa kine ki khusnam la sam ha ka jingïalang kaba la long ha Silver Oak Hall, India Habitat Centre, New Delhi, ha ka sngi Balang.
Ka projek jong ka tnat rep ka pynshlur ïa ka jingpynmih ïa ki sboh dawai bym don jingktah ba tip kum ki bio-fertiliser bad kumjuh ki dawai pynïap khniang bym don jingktah ïa ka mariang lane ki biopesticide bad ki tiar kiba pyndonkam ïa ki jingthaw ba im ban tehlakam ïa ki khñiang pynjulor, khnang ban ïarap ïa ki nongrep ban shim ïa ki rukom rep kiba long ki paralok jong ka mariang bad ban pynduna ïa ka jingshaniah ha ki tiar rep kiba shna da ki dawai khlem da pyndonkam ïa ki jingthaw ba im.
Kane ka ïahap bad ka thong jong ka Meghalaya ban kyntiew ïa ka rep khlem dawai bad ka rep kaba lah ban neh. Ïa ka projek la pyni da ka Dr Pynhunlin Nola K Dohling, Scientific Officer (Rice), SBCL, Upper Shillong.
Ka LARITI Performing Centre jong ka tnat Arts and Culture ha Mawkasiang ka la ïoh ïa ka jingithuh na ka bynta ka jingpynkhlaiñ ïa ki jingtei kiba ïadei bad ka kolshor bad ka jingpynlong ïa ka jaka kaba kyrpang na ka bynta ki jingïalehkai ba pyni ïa ki sap bad ki jingïashim bynta ha ki kam kolshor.
Kane ka jaka ka pyni ïa ka pateng tynrai jong ka Jylla bad ka ai lad ban pynroi ïa ki sap jong ki nongtrei kam ïalehkai bad ki nongshna sap. Ïa ka projek la pyni da ka Special Secretary bad Director of Arts and Culture, ka Kong Camelia Doreen Lyngwa.
Kine ki ar tylli ki jingithuh ki pyni ïa ka jingkongsan kaba ka Sorkar Jylla ka buh ha ka jingpynmih ïa ki jingmut thymmai, ka jingpynneh pynsah ïa ki marpoh khyndew bad ki jingdon jingem jong ka mariang, bad ka jingpynbiang ïa ki jingshakri paidbah, la ong ka kyrwoh na ka ophis sorkar.