Ka jingpyndonkam ïa ka Hindi ka dei ban kiew ryngkat ka jingburom ïa ka Ktien lajong : Joint Secretary Health ha NEIGRIHMS

Shillong, Risaw 17 : Ka jingpynroi ïa ka ktien Hindi ka dei ban ïaid ryngkat bad ka jingburom ïa ki Ktien lajong jong ki thaiñ bapher bapher, khamtam eh ha ka thaiñ Shatei Lam Mihngi jong ka ri India, la ong u Joint Secretary jong ka tnad ka Koit ka Khiah jong ka Sorkar India, u Elangbam Robert Singh.
Ïa kane u la kren haba plie ïa ka jingïalang kaba 11 jong ka National Official Language Conference kaba long ha NEIGRIHMS, Shillong ha ka taiew ba la dep.
Na ka liang u Kongsan haba kren ha ka jingïalang plie kaba long ha Lecture Theatre-I, Administrative Block u la pynpaw ïa ka jingdonkam ban pyntreikam ïa ka ktien Hindi kum ka ktien ophis jong ka Sorkar India ha ka rukom kaba suk ban pyndonkam bad kaba kynthup lang ïa baroh.
U Director jong ka NEIGRIHMS, u Prof. (Dr.) Nalin Mehta, ha ka jingkren pdiang sngewbha jong u, u la ai jingïaroh ïa ki bor pynïaid halor ki jingpyrshang jong ki ban pynroi ïa ka Rajbhasha Hindi ha ka thaiñ Shatei Lam Mihngi. U la pdiang sngewbha ruh ïa ki nongwan shim bynta na ki jylla bapher bapher.
Haba sdang ïa ka jingïalang, u Joint Director (Official Language), u Vinod Kumar, u la batai ïa ka nongrim bad ki jingthmu jong kane ka jingïalang.
Ha ka sngi plie, la pyllait paidbah ïa ki kot jingthoh kiba la pynmih da ka AIISH, Mysuru bad ka CGHS, Ahmedabad.
Ïa ka jingkren ai khublei la pynkut da ka Prof. (Dr.) Manika Agrawal, Head of Department jong ka Obstetrics and Gynaecology bad In-charge jong ka Official Language Section ha NEIGRIHMS.
Ha kine ki lai sngi, ki jingïalang ki la don ïa bun tylli ki jingïakren halor ki phang bapher bapher. Ha ka sngi kaba nyngkong, u Chief Electoral Officer jong ka Meghalaya, u Dr. BDR Tiwari, u la kren halor ka phang “Ka jingpyndonkam ïa ka Hindi ha ka thaiñ Shatei Lam Mihngi.”
Katba u Prof. Partha Sarathi Pandey, Regional Director jong ka Central Hindi Institute, Shillong, u la kren halor ka phang “Ka Hindi kaba lah ban pyndonkam ha ki kam man ka sngi – ka jingdonkam bad ki jingpyrkhat.”
Na ka liang u Prof. (Dr.) Animesh Mishra, Head of Department jong ka Cardiology ha NEIGRIHMS, u la kren halor “Ka bynta jong ka Hindi ha ka jingïaid jong ka India na ka ri kaba dang pynroi sha ka ri kaba la kiew.”
Ha ka sngi kaba ar, u Vinod Kumar u la kren halor ka jingpynroi ïa ka ktien Hindi ha ki ri bar ri. U Prof. Achintya Kumar Sharma, uba long Chairperson jong ka Official Language ha IIM Shillong, u la kren halor ka bynta jong ka ktien ha ka ‘quantum healing’. Katba ka Prof. (Dr.) Manika Agrawal ka la kren halor ka jingïadei hapdeng ka music bad ka koit ka khiah.
Ka jingïalang kaba lai sngi ka la kut da ka jingsam ïa ki certificate, ka jingïalang pynkut, ki prokram kolshor bad ka jingleit jngoh sha ki jaka bapher bapher.
Kane ka jingïalang ka la ai lad ïa ki ophisar na ki tnad Sorkar bad ki kynhun bapher bapher ban ïasam ïa ki jingmut bad ki jingtip halor ka rukom pyntreikam kaba paka ïa ka polisi jong ka ktien ophis jong ka Sorkar India.