10 lak tyngka kular u Myntri Rangbah ka jylla ban ïarap ïa ka ïew ha ka shnong Tiehsaw

Nongstoiñ, Risaw 16: U Myntri Rangbah ka Jylla u Conrad K Sangma ha ka sngi palei u la kular ban ïarap kyrkieh ïa ka iew jong ka shnong Tiehsaw kumba 10 lak tyngka ei ei, na ka bynta ban pynbha shuh shuh ïa kaei kaba ka shnong ka la sdang hi kumba 9 lak tyngka na ka fund shnong.
Ïa kane ka jingpynbna na ka liang u Conrad Sangma u la khlei ha ka jingïalang plie ïa ka ïew jong ka shnong, ha ka jingsakhilang ruh da kiwei pat ki kynrem ki lyndan, ba kynthup ïa u Myntri sorkar u bah Methodius Dkhar myntri ka Food Civil Supplies & Consumer Affairs Department, u MLA ka Nongstoiñ u bah Gabriel Wahlang, ka Hema Nayak DC, u bah H.Kharkongor SP, u bah M.Dkhar Headman ka shnong Tiehsaw, ki ophisar sorkar ki riew rangbah ka shnong bad ki paidbah ka shnong Tiehsaw.
Na ka liang jong u Myntri Rangbah haba ai jingkren ha katei ka sngi, u la ai jingïaroh ïa ka Dorbar Shnong Tiehsaw kaba la lah ban shna ïa kitei ki dukan da ka fund shnong. U la ong ruh ba barabor ka ju long ba ki briew ki khot ban long kongsan sha ki jingïalang, ban phah plie ha kaba ki pynlut hi ïa ki jingtei.
U la ong ba ki nongkhot hi barabor ki pan kylla na ki kongsan ïa ka pisa ba la pynlut, hynrei ka shnong Tiehsaw ka long kaba pher bad ka kyrpang namar ym tang ba ka la shna ïa ka ïew shnong, hynrei ka la thied ruh ïa ka jaka na ka bynta ka madan phutbol.
Na ka bynta ka madan phutbol u Conrad u la pynbna ba un ai jingïarap kyrkieh 10 lak na ka Chief Minister Development Fund bad hadien ba ka shnong ka la phah ïa ka estimate, un sa peit la ka long na ka CM fund lane na ka tnad Sports ban mang pisa. U la kitbok ruh ba ka shnong lyngba kane ka jingpyrshang jong ka ban seng ïa ka ïew shnong, kan ïarap ban kyntiew lem ïa ka ka ïoh ka kot sha ki nongshong shnong baroh.