Durga Puja: Khang pyrshah ka Shillong Traffic Police ban pynïeng kali hajan pandal

Shillong, Risaw 16: Ki pulit ka Shillong Traffic jong ka nongbah Shillong ki la pynbna ia ki kyndon pyniaid kali kiba pyrkhing bha na ka bynta ka jingrakhe Durga Puja kaba la buh ban pynlong naduh ka 17 haduh ka 20 tarik u Risaw, kaba la pynkut noh da ka jingleit pynngam ia ki blei thaw ha ka 21 tarik u Risaw.

Ka kyrwoh khubor ba la pyllait da u Superintendent of Police (Traffic), East Khasi Hills, u Dr Hari Prasamth M R ha ka sngi Thohdieng u la ong ba la buh ïa ki lad ki lynti kum ka jingkhmih lynti ïa ka jingïaid ki kali heh bad ki nongïaid kjat ha kylleng ka nongbah ha kane ka por lehkmen.

Katkum ka jingai jingmut, yn pyntreikam ïa ki No Entry katkum ki sector ryngkat bad ki jaka ba la buh ban ym shah ieng kali ban pynthikna ïa ka jingïaid beit ïaid ryntih jong ki kali.Ki pulit ki la mana ruh ban pynieng bad sangeh ia ki kali hapoh ka jingjngai kaba 100 meter na ki puja pandal ha kylleng ka nongbah Shillong.

Ka kyrwoh ka la maham ba kano kano ka jingpynkheiñ kan khring ïa ka jingpynshitom kaba tyngeh kynthup ïa ka jingshah kynnoh, ka jingshah klam ïa ki kali katkum ki kyndon aiñ kiba ïadei.

Da kaba kyrpad ïa ka jingïatreilang jong ki paidbah, ki pulit pynïaid kali jong ka nongbah Shillong ki la kyrpad ïa ki nongshong shnong bad ki nongwan jngohkai ban ïaid lyngba ïa ki jingai jingmut ba bniah ba la pyndait ryngkat bad ka jingpyllait, ban thmu lypa ïa ka jingleit jingwan jong ki, ban jied ïa kiwei pat ki lynti ban lait na ka jingkhapngiah bad ban pyndonkam tang ïa ki jaka ieng kali ba la ai bor katba ki dang bud ryntih ïa baroh ki jingbthah ïaid kali.

Na ka bynta kino kino ki jingïarap ne jingpynshai kiba ïadei bad ka leit ka wan ha ki sngi Puja, ki paidbah ki lah ban ïa kynduh ïa ki pulit pynïaid kali jong ka Shillong lyngba ki hynriew tylli ki tnad pynïaid kali jong ki kiba don ha Sadar, Laitumkhrah, Madanrting, Lumdiengjri, Rynjah, Laban bad Mawlai.Ka helpline number 112 kaba trei kam.

Ka tnad ka la pynthikna ba yn ailad nyngkong eh ia ki kali ba leit kyrkieh kynthup ia ki kali kit nongpang bad ki kali pynlip ding bad yn pynsuk ia ki katkum ka jingdonkam.

Da kaba pan jingiatreilang na baroh ban pynthikna ia ka jingrakhe kaba shngain bad kaba khlem jingeh, u SP (Traffic) u la ong ba kano kano ka jingeh kaba mih namar ki jingkhang ka long kaba sngewsih shibun.