Kam long kaba suk ban thoh ïa ki kot : Haduh 2 ne 3 snem kan shimpor ban pynwandur ïa ka: Dr. David

Shillong, Risaw 16: U Dr David Lyngdoh ha ka sngi Thohdieng u la ïoh ban pyllait paidbah ïa ka kot kaba u la thoh hi dalade kaba la ai kyrteng “The Security of Khasi Jaiñtia & Garo People”, kaba mut ka jingshngaiñ jong ki paid Khasi Jaiñtia bad ki Garo.
Ha kane ka kot la thoh ïa ki lynnong kot shaphang ka ILP, ka Sixth Schedule, ka Eight Schedule, Article 371 bad kiwei kiwei ki lynnong kot kiba kongsan ban sam lem sha ki samla pule bad sha ki riew ieid pule kot.
Ha kane ka jingpyllait ïa ka Kot ‘The Security of Khasi Jaiñtia & Garo People’ la pyllait paidbah da u Parish Priest ka Umsning Parish u Fr Pius Shadap ha ka jingïadonlang u Dr David Lyngdoh, ka Principal jong ka Skul St Michael Higher Secondary School Umsning ka Sister Aidalin Sohklet, u Chairmam ka Umsning Town Dorbar u Bah Rocky Kylla, ka President jong ka RAWA ka Kong Balakyntiew Umbah, u President ka CORP u Bah Pateng Myrsing, u Bah ADG Kharbani ki bahaïing ha sem jong u Dr David Lyngdoh ha ryngkat bad ki nongshah khot sngewbha ha kane ka sngi.
Haba ai jingkren na ka liang u Dr David Lyngdoh u la ong ba ka jingthoh ïa ka kot kam dei kaba suk namar ka shim por kumba 3,4 snem ba hap pynwandur bha ïa ki kyntien hashwa ban thoh, bad u la ong ruh dei lyngba ka jingïalam lynti jong u Late Fr Francis Kharwanlang.
U Dr David Lyngdoh ba kumno ban thoh kot bad ban pynwandur ïa ki kyntien bad u la ong dei lyngba ka jingbtin lynti jong u Fr Francis Kharwanlang ba u la ïoh ban pyndep ban thoh ïa kane ka kot bad ban ïoh pyllait paidbah syndon mynta ka sngi.
Bad shuh shuh u la ong ruh ba u dang pynkhreh sa kawei pat ka kot kaba dei jong ki samla wadkam wadjam ha ka Competitive Examination khnang ba ki samla wadkam wadjam kin ïoh ban pule ïa kane ka kot ka ban long kum ka jingïarap na ka bynta ka jong ki ha ka por ba ki ïakhun ïa ka Exam UPSC, MPSC bad napoh ka DSC.