Ha ka jingsakhi ki paidbah T. 2.5 klur pyllait paidbah u Bah Renikton ïa ka MLA skhim 2025 -26 ha Mawkyrwat

Mawkyrwat, Risaw 15 : U bah Renikton Lyngdoh Tongkhar uba dei MLA na ka Mawkyrwat Constituency, u la ïoh ban pyllait paidbah ïa ki skhim paidbah bad kumjuh ruh ki projek bapher bapher kiba la poi haduh ka mang pisa kaba T. 2.5 klur lyngba ka Special Rural Works Programme (SRWP) jong u snem 2025-26 ha ka jingïalang ba la pynlong ha ophis treikam jong ka partry ha Mawkyrwat, South West Khasi Hills District.

Lah ban kdew ba kane ka jingpyllait ïa ka MLA Scheme ka long ban pynthikna ba ïa ka pisa paidbah lyngba katei ka skhim la pyllait ha kaba shit ba shai khlem kano kano ka jingbuh rieh ne leh politic kaba dei sha baroh ki nongïoh jingmyntoi, da kaba ula buh kyrteng ïa baroh ki jait skhim bad kumjuh ruh ïa ki kyrteng jong ki nongïoh jingmyntoi (na ka bynta ki skhim paidbah) ha ka flex kaba ula pynpaw paidbah.

Haba kren ha ka jingïalang, u bah Renikton Lyngdoh Tongkhar u la ong na ha ki 8 tylli ki snem ha ka jinglong kum u nongmihkhmat u la pynpaw ba ki la don shibun ki jingkylla hapoh ka konstitwensi kiba lah ban pynurlong ïa ki jingkwah ki paidbah ha kaba ïa dei bad ki kam pynroi. “Haba phai shaphang ki jaka sumar ha ka koid ka khiah ne ki surok khamtam ha ki thaiñ war Mawbidong bad ha ki thaiñ Nongnam bad kiwei de ki jaka ba kim lah mutdur ban lah ban pynïoh ïa ki surok hynrei mynta ka kynti ki la ïoh ïa ka surok kaba bha, haba ki kali ki la poi suk ha ki shnong ki jong ki bad kane ka la pynsuk shibun ki ki paidbah ka thaiñ”, ong u bah Renikon.

Shuh shuh u la ong ruh ba kine kiei kiei baroh ki urlong lyngba da ka jingïatreilang bad ki paidbah jong ka thaiñ Mawkyrwat kaba ki la shaniah ha u kum u nongmihkhmat bad u da kwah ruh ba ha kine ki snem ki ban dang wan yn dang lah shuh shuh ban pynurlong ban pynïoh ïa ki jaka sumar nongpang kiba bha kumba la leh ïa ka Civil Hospital Mawkyrwat ha kaba la ïoh rah ïa ka nam ka burom bad shibun kiwei de ki jingdonkam pynroi yn dang ïai pyntyllun ha kine ki snem baroh, “ïa kaei ba kiba dei jong ki paidbah ai ba kin leit sha ki paidbah khlem da don kano kano ka jingleh tam shi spah na ka shi spah ka dei jong ki paidbah, u la ong

Ki skhim kiba ula pyllait paidbah mynta ka sngi ki kynthup ïa ka jingshna ïa ki kamra klas jong ki skul, ki madan ïalehkai, ki lynti ïaid kjat, ki jaka saitjaiñ, ki jaka leit shabar, ki jaka ïeng kali, ki jaka ap bus, bad kumjuh ruh ki skhim shimet sha 774 ngut ki ‘riew shimet kaba long mar 10,000/- na ka bynta ban kyrshan ha ka kam rep kam riang, ki nongïoh tin 200 ngut, small solar 50 ngut, kor suhjaiñ 15 ngut bad tiar misteri 10 ngut ha ryngkat kiwei de ki lad jingïarap.

Ha kane ka prokram la wan ban ïashimbynta ruh da u Bah I. Lawriniang, MCS, Block Development Officer (BDO) ka Mawkyrwat C&RD Block, u Bah Treling Marweiñ, u bah H.S. Diengdoh lem bad kiwei kiwei, bad kumjuh ruh ki paitbah kiba dei ki nongïoh ïa ka jingïarap lyngba ka MLA Scheme.