Shillong, Risaw 16: Ka kynhun ïakura jong ka Boxing Association of East Khasi Hills District ka la long ka lahduh ha ka rynsan ïakura kaba la tip da ka ‘State Boxing Sub Junior U-15 Boxing Championship 2026’ kaba la pynkut noh hynne ka sngi Thohdieng ha Raid Laban College, Madan Laban, Shillong.
ïa kane ka lympung la pynlong da ka Meghalaya Boxing Association (MBA), bad la kyrshan bad bei pisa ïa ka da ka tnat Directorate of Sports & Youth Affairs jong ka sorkar Meghalaya, bad ka jingkyrshan na ka Chief Minister Special Scheme.
La wan kongsan hynne ka sngi da u Bah Sanbor Shullai, ba dei ruh u Myntri ka sorkar jylla bad ha ka juh ka por u MLA ka 19 South Shillong, uba la sakhi ïa ki katto katne ki jingïakhun phainal. Nalor u kongsan kiba la ïadon lang ha kane ka sngi ki kynthup ruh ïa u Rangbah Shnong bad Secretary Shnong ka Madan Laban & Riat Laban, bah Iostar Sun bad bah R. G Marbaniang, u Secretary ka Raid Laban College bah R. Rynjah bad kiwei kiwei.
Kaba bud hadien ka Boxing Association jong ka EKHD kadei ka kynhun ïakura jong ka Eastern West Khasi Hills District, kiba la pyndep ha ka kyrdan ba ar lane Runners-Up.
Ka la don ruh ka jingsam ïa ki khusnam sha ki nongïakura ba kynsai tam lane ‘Best Boxer’ ha kaba u Salweang Sangma u la khur na ka liang ki shynrang bad ka Tariasa Marak na ka liang ki kynthei, katba ka khusnam Emerging Boxer ka leit sha u Elegant Sadap jong ka Ri-Bhoi.
Related Posts
Haba phai sha ki jingïakhun phainal; Ha ka kyrdan 28-30 kg ka namjop la khur da u Wanmi Dashngain Kharkongor, katba u Marcellino R. Rimen u la wan ba-ar; ha ka 30-33kg la jop da u Daniel Nongrum da kaba pynliem ïa u Safal Thapa; ha ka 33-36kg la jop da u Salweang M. Sangma bad u Samridh Biswa u la wan ba-ar; ha ka 36-38kg ka namjop ka leit sha u Kitbok Shabong bad u Elegant Shdap u la wan ba-ar; ha ka kyrdan ïakura kaba 38-40kg, ka nam jop ka leit sha u Steven Khyllep bad u Bantei Rani u la wan ba-ar.
Ha ka kyrdan ïakhun kaba 40-42kg la jop da u Ethan Nongdhar, bud sa u Banlang Lyngdoh ha ka kyrdan ba ar; nangta ka kyrdan ïakura kaba 44-46kg ka namjop ka leit sha u Debraj Thapa bad uba wan ba-ar udei u Shandor Kharchandi; ha ka 46-48kg ïa ka namjop la khur da u Kabibath M. Sangma bad u Denzil Myrthong u la wan ba-ar; ha ka 48-50kg ka namjop ka leit sha u Samha o Malieh bad u Ariri Ch Momin u la wan ba-ar; ha ka 50-52kg ka nam jop ka leit sha u Enzo Jordan Nongkhladw, kyrdan ba-ar sha u Dedo R Marak; bad ha ka kyrdan ïakura kaba 52-54kg ka nam jop ka leit sha u Ronak Thapa bad kyrdan ba-ar sha u Obadia R. Marak.
Ha ka kyrdan kaba 54-57 kg; la jop da u Rudolf Lyngdoh bad u Dame La-ai Janai Ksiang u la wan ba-ar; nangta ka kyrdan ïakhun kaba 57-60kg ka nam jop ka leit sha u Immanuel SM Sangma hadien ba u la pynliem noh ïa u Reginal Dkhar.
Haba phai pat sha ka liang ki khynnah kynthei; ka Usiful Iawphniaw ka la khur ïa ka nam jop ha ka kyrdan ïakhun kaba 30-36kg da kaba pynliem ïa ka Saphibakyrmen Kharsyntiew; nangta ha ka kyrdan 38-42kg la jop da ka Haphibasuk Kharsyntiew kaba la pynliem noh ïa ka Maphibanri Wahlang; ha ka ïakura kaba 42-46kg ka nam jop ka leit sha ka Tariasa K Marak hadien ba ka la pynliem ïa ka Ira Bang; ha ka kyrdan ïakhun kaba 46-48kg ka nam jop ka leit sha ka Dashisha Marbaniang bad ka Ribashisha Sylliang ka la wan ba-ar.
Nangta ha ka kyrdan 48-50kg ka namjop ka leit sha ka Judith Rympei hadien ba pynliem ïa ka Darissa Adaia Batngen Lamin; ha ka kyrdan 50-54kg la jop da ka Rika Dame Sungoh bad ka Sheri Angels Laloo ka la pyndep ha ka kyrdan ba-ar, katba ha ka kyrdan ïakhun kaba 57-60kg la jop da ka a Yangzan Tamang bud ka Cassandra Diophika Wankhar ha ka kyrdan ba ar.
Ha kane ka kynti, ka MBA ka la pynïakhun kyrpang ïa ka ïakura Elite Women ha ka kyrdan jingkhia kaba 54-57kg, ha kaba ka Nalangki Iakai ka la pynliem ïa ka Pynjanai Syngkli.