SSA 1st Division 2026: Kiew kyrdan ka Nongkrem bad ka Mawkhar sha ka SPL hadien ba rung phainal

Shillong, Risaw 16: Ka Nongkrem SC bad ka Mawkhar SC ki la pynthikna ïalade ban kiew kyrdan sha ka Shillong Premier League ha u snem ban wan hadien ba baroh ar ki la poi sha ka phainal ha ka First Division 2026 jong ka Shillong Sports Association.

Baroh ar ki la jop ïa la ki jong ki jingïakhun Semi final kiba la long hynnin ka sngi Palei (ka 15 tarik Risaw) ha madan First Ground-SSA Stadium. Ka Nongkrem ka la pynliem noh ïa ka Mylliem Lum FA da 2-0 ha ka semi final ba nyngkong, katba ka Mawkhar ka la jop da 2-1 pyrshah ïa ka Malki SC.

Ha ka jingïakhun ba nyngkong, u Aiboklang Nongrum (1′) u la pynkhihjar dang kloi mar ïa sdang na ka bynta ka Nongkrem, nangta u Sholinstar Syngkli (34′) u la pynjlan ar shah ïa ka kol lamkhmat, kaba la paw ba ka la biang ïa ka kynhun ban khur ïa ka jingjop.

Nangta ka jingïakhun kaba bud la sakhi ïa ka Mawkhar kaba la ïoh ban lamkhmat ïa ka kylla step na ka kol ba la kum thep hi (own goal) da u rangïalehkai ka Malki, u Banshaniah Kharkongor, hynrei ka kynhun ka la lah pat ba kan pynïakhaid lyngba u Bryan Basaiawmoit (60′) ha ka kylla miet. Hynrei ka jingkmen ka la neh tang shipor, naba ka Mawkhar ka la ïoh ban thep ïa ka namtam tang hadien 5 minit lyngba u Emanuel Rongrin (65′).

Ka jingjop ym tang ba ka la pynthikna ïa ka Nongkrem bad ka Mawkhar ban ïoh ïa ka lad ban ïaknieh ïa ka nam lahduh bad ruh ban kiew kyrdan sha ka Shillong Premier League ha u snem ban wan, hynrei ka la pynskhem ruh ïa ka jaka jong ki ban ïashim bynta ha ka SSA Champions Cup ban sa long ha u bnai ban wan.