Ym lah jubab ka EC katno la pynlut ba ïakhun mukotduma ha Supreme Court pyrshah ïa ka Hima Mylliem

Shillong, Risaw 15: Ka Executive Committee jong ka Khasi Hills Autonomous District Council (KHADC) ha ka sngi Palei hapoh ka Dorbar Tlang ka khlem lah ban ai ka jubab ha kaba ïadei bad ka jingkylli jong u nongïalam ka liang ïatei u Bah T W Chyne ba haduh katno tyngka ba ka la hap ban pynlut ban ïakhun mukotduma pyrshah ïa ka Hima Mylliem hapoh Supreme Court.
U nongïalam ka liang ïatei u bah Chyne haba ka mat jingïatai halor ki rukom treikam jong ka EC haba ïadei bad ki jingtreikam jong ka tnat Elaka khamtam eh ha kaba ïadei bad ka jingshim rai ban suspen ïa u Syiem ka Hima Mylliem, nangta ka kynrum kynram hapoh ka Hima Sohra bad kumjuh ruh hapoh ka Hima Langrin haba ïadei bad ka kam thung Syiem.
U MDC ka Sohra haba ïatai shaphang kane ka phang u la kyntu ïa ka EC ba kan kiar naba la ïohi ba manla ka por bun satang ka jingshah rem mukotduma bad ym lah ban tip ruh ba haduh katno tylli la lah ban jop ïa ki case bad haduh katno ka rai ka long kaba biang bad haba ïadei bad ka jingpynksan jong ka High Court ïa ka Hima Mylliem u la kyntu ruh ïa ka EC ba kan peit khmih bniah ba nangne shakhmat kam dei ban jia shuh.
“Man kiba phi weng ki leit sha Ïingbishar bad ki ïoh Stay Order,” bynrap u MDC ka Sohra da kaba pynpaw ruh ba ka tnat Elaka ka dei ban pynkupbor ïa ki dorbar hima, dorbar shnong bad ka jaitbynriew ruh ka im naba ka council ka dei ka nongri nongpeit nongkhmih.
“Teng teng mih ki kynrum kynram ha hima sima, haba peit iba ka don eiei bad ka council ka pyndonkam bakla ïa ka bor ban weng ne suspen bad na kane mih ki jingkhih phaloh ki hima, kumta ka EC kadei ban kiar na kine ki kam pynkhyllem, suspen Syiem ne Rangbah Shnong. Halor ka Hima Mylliem ka mih ka daw bym siew ïa ka bhah kumta ka jingkylli ka long ba lada ka EC ka shim ka rai kaba biang balei pat lada poi sha ïingbishar ka rai jong ka EC ka ïap noh bad ka ïingbishar kam pynksan ïa ka rai ka EC,” ong u MDC ka Sohra.
U la pynpaw ruh ka jingsngewkhia ban ïohi ba ki khun ki hajar ki la hap ban wan sha Council ban pyrta pyrshah ïa ka KHADC shah kynnoh lang baroh ki MDC.
Haba pynpaw ka jingsngewkhia halor ka jingweng, jingsuspen bad jingthung Acting Syiem u Bah Chyne u la ong, “Halor ka Hima Mylliem ngi kwah ban tip haduh katno ka Council ka la hap ban pynlut haba ïakhun case na High Court Meghalaya, sha Supreme Court bad mynta ka la poi pat ha Guwahati High Court.”
Katba u MDC ka Langrin u Bah Pius Marwein haba shim bynta ha ka jingïatai u la ong ba bun ki case ha High Court dei hi jong ka tnat Elaka bad ka EC kaba mynshwa ka don tang kumba 15 haduh 16 tylli ki mukotduma bad ha kane ka EC kaba mynta ki don haduh 70-80 tylli ki mukotduma.
Haba jubab ïa kane ka jingïatai u Executive Member jong ka tnat Elaka uba dei u MDC ka VPP na Jaiaw Mawprem Constituency u Bah Denzil Chen u la ong ba ka EC kaba mynta lyngba ka tnat Elaka ka don barabor ban pynkupbor ïa ki dorbar Hima, ki dorbar shnong, ka rukom synshar tynrai bad ka EC kam don jingthmu ban pynduna ne pynduhbor ïa ki Syiem bad ki kam kiba ktah ïa ki riti dustur kiba la hiar pateng.
“Ngim kwah ban tuklar than hynrei lada wan ki jingujor sha ka EC ngi da bishar katkum ki dustur, ki rukom treikam bad ki kyndon aiñ. Ka jingbun ki mukotduma ha High Court kam mut ba bakla. Halor ka Hima Mylliem ka dang ïaid ka jingkyrpad ka jingbishar (Hearing) ka dang ïaid. Ki jingwan ban pyrshah ha KHADC ym lah ban khang naba kadei ka riti synshar paidbah bad haba shim ïa kano kano ka case ka Elaka ka da examine bha, ngi bud bha, ngi ai show cause notice, bud ka hearing kiba long thik katkum ka Act bad kito kiba wan ban pynpaw jingpyrshah ha KHADC kidei ki bym kwah ban leit sha ïingbishar bad haba weng, suspen bad kiwei ki kam la ïaid thik katkum ki rukom treikam bad ki aiñ bad halor ka Hima Mylliem ngin peit na ka jingmih jong ka mukotduma jong ka Guwahati High Court,” ïathuh u EM ka Elaka bad halor ka jinglut jong ka jingiakhun mukotduma ha Supreme Court u la ïathuh ba um pat lah ban ai ïa ka jingkheiñ naba um don jingtip bad kam pat don hapoh ki kti jong u.
U la ïathuh ruh ba ka EC ka la 1959 Committee, nangta ka Sanad Committee ban khmih halor ki Act ki Hima bad halor ka jingkynnoh ba la suspen ïa u Rangbah Shnong ha Shella kane kam dei ba leh da ka Council hynrei ka wan na u Wahadadar.