Shillong, Risaw 15 : Ka Joint Action Committee (JAC) Against Shillong Ropeway Project ka la rai ban bteng ïa ka jingïakhih tad haduh ban da pynsangeh noh ïa ka projek Shillong Ropeway ha Lum Shyllong, hadien ba ka jingïakren bad ka Sorkar kam shym la poi sha ka jingïamynjurlang.
Hadien ka jingïalang kaba la pynïaid da ka Commissioner & Secretary ba khmih ïa ka tnat Tourism, ka Kong R.M. Kurbah, ka Secretary jong ka JAC, ka Dr. Linda Marbaniang, ka la ong ba ka Committee ka la rai ban bteng ïa ka jingïakhih jong ka.
Haba kren bad ki lad pathai khubor, ka Secretary ka la ong ba ki paidbah ka Shillong ki donkam ïa ka um bad ka mariang kaba khuid, ym ïa ka ropeway ha Lum Shyllong. Ka la kynnoh ruh ba ka jingpom ïa ki dieng ka ktah ïa ka mariang bad ka jingneh jong ka um.
“Ngim shym la poi sha kano kano ka rai kaba ïamynjurlang ha ka jingïalang bad ka tnat Tourism. Kum ka JAC, ka khubor jong ngi ka long kaba shai bad kaba skhem ba ngi kwah ba dei ban sangeh noh mardor ïa ka projek ropeway,” la ong ka Dr. Marbaniang.
Ka JAC ka la khot ïa ka rally paidbah kaba jai jai ha ka 17 tarik Risaw, kaba sdang na Last Stop, Laban bad kut ha Sericulture Farm, Lum Shyllong.
Haba kynnoh ïa ka jingjulor jong ka mariang, ka la ong, “Ki la pynjulor ïa u Lum Shyllong bad pom ïa ki dieng. Ngi dei ban peit ïa ka jingshisha. Ka Meghalaya ka don ka jingduna slap haduh 60 percent. Kane ka dei ka jingshisha kaba paw.”
Ka Dr. Marbaniang ka la buh jingkylli ruh halor ka jingbym pynlong ïa ka public hearing shwa ban sdang ïa ka projek. Haba pyrshang pat ban ïakren bad ka Commissioner & Secretary jong ka tnat Tourism, Kong R.M. Kurbah, kam shym la kwah ban kren ei ei halor kane ka bynta.
