Plie u Conrad Sangma ïa ka jingshakri ka MCH Hospital ha WKH Nongstoiñ

Nongstoiñ, Risaw 15: Ha ka sngi palei jong ka taiew, u Myntri Rangbah ka sorkar Jylla u Conrad K Sangma, u la plie bad pynbna paidbah ruh ba ka Maternity & Child Health (MCH) Hospital Nongstoiñ, kan sdang treikam noh naduh mynta ter ter, kumba la angnud ki paidbah jong ka District hi baroh kawei, ïa kaba la dep kular ruh ha ka jingïalang CM-Connect.
U Myntri Rangbah u la pynkup burom ruh ïa ki trai jong ka jaka ba ieng ka MCH Hospital, nangta buh ïa u mawnongrim jong ka Golden Jubilee Garden ha Nongstoiñ, buh ïa u mawnongrim jong ka Building DIET ba thymmai bad buh ïa u mawnongrim ka surok Sohpïan-Nongstoiñ.
U la aiti ruh ruh ïa ka ambulance kaba la ai sngewbha da ka IDBI Bank hapoh ka CSR sha ka tnad ka koit ka khiah.La leh ïa kine ryngkat ka jingsakhilang jong kiwei de ki kynrem ki lyndan ba ïa u Myntri Sorkar Bah Methodius Dkhar, MLA Bah Gabriel Wahlang bad RG Momin lem bad kiwei kiwei.
Haba ai jingkren ha ka jingïalang kaba la long ha MCH Hospital, u Myntri Rangbah u la ong ba ka Nongstoiñ MCH ka dei ka jingkular ba u la ai ha ka jingïalang CM Connect, kaba ki paidbah ki la pynsngew ïa kane ka jingeh kaba la slem bha ban pynbeit.
U Myntri Rangbah u la ong ba ka CM Connect ka dei ka jingpyrshang jong u ban pynthikna ba ki jingeh jong ki paidbah ka poi sha ka skhor jong u Myntri Rangbah bad sha baroh ki tnad Sorkar.
U la ong ruh, “Nga shim ba kane ka lah ban dei kawei na ki synshar paidbah ba paka tam kaba ngi don. Ïa kane la shim kum ka jingleh kaba bha tam ïa kaba u Myntri Rangbah duh bad ka ophis jong u, ki la kyntu ïa nga ban batai halor ka CM Connect sha baroh ki Myntri Rangbah ka ri India”.
Nalor kata u la ïathuh ba hadien ba dep ka CM Connect, ki heh Ophisar ka tnad ka koit ka khiah ki la shong bishar ïa ki kam ba la pyntrei ha u Naiwieng 2025 bad pynbeit ïa ki nongtrei, ki tiar sumar bad ki jingdonkam baroh, kaba lam sha ka jinglah ban pyntreikam noh ïa ka Hospital kumba ka long mynta.
Ïa ka Maternity and Child Health Hospital ha Nongstoiñ lah tei ha ka jinglut kaba kot T.31.05 klur.Ka Hospital ka don ïa ka OPD bad Laboratory complex, ka emergency unit, kamra kha khun, ICU, Neonatal Intensive Care Unit (NICU) bad ka operation theatre complex. La pyndait ruh ïa ka PSA oxygen plant ha ka jinglut ba kot T.0.37 klur.
U la ong ruh ba la shimkhia bha ïa ka MCH Hospital ha Nongstoiñ, namar ka jingïap ki longkmie ba kha khun bad ki khunlung ha West Khasi Hills ka dei kaba heh duh hapoh ka Jylla.
La tyrwa ruh ban buh ïa ka District Early Intervention Centre (DEIC) hapoh ka Hospital na ka bynta ban khmih bniah bad ai jingsumar ba kham kloi ïa kiba slem ban wan sha ka jaka sumar bad ka jingduna dkhot met ki Khynnah.
Haba pynpaw halor ki kam pynroi ba kim dei ban shu kut tang ha Shillong bad Tura, u la ong ba ka jingkynshew kaba heh duh ka dei T.383.91 klur ban pynheh ïa ka surok ba 35 km na Maweit-Nongjri kaba dei shibynta jong ka surok Nongstoiñ-Maweit-Nongjri, kaba pynïasoh ïa ka Nongstoiñ sha Ranikor, South West Khasi Hills.
Baroh lang, ki jingkynshew ha ka project surok ha Nongstoiñ ka kot sha ka T. 498.31 klur, surok Nongstoiñ-Nongjri T. 383.91 klur, surok Nongstoiñ-Maweit hapoh ka RIDF T. 63.01 klur, surok Sohpian-Nongstoiñ T. 22.27 klur, surok Nongkhlaw-Byrki-Umdohlun ryngkat ar tylli ki jingkieng hapoh ka PMGSY-III T. 29.12 klur.
U Myntri Rangbah u la bthah ïa ka tnad PWD bad ki contractor ba kin bat ïa ka jingtreikam bha da ki maw ba paka, ki lynti ïaid kjat bad ki nala. U la bthah ruh ïa ka DC bad ki MLA ba kin peit thuh bha ïa ki kam bad ai jingtip beit beit sha u.
Ha kaba ïa dei bad ka jingdap 50 snem jong ka West Khasi Hills, u Myntri Rangbah u la ong ba ki snem ban wan ki dei ban long kiba kongsan bha na ka bynta ka lawei jong ka distrik. U la kyntu ban buh ïa ki thong katkum ki constituency bad ka distrik kaba 3 snem, 5 snem, 10 snem bad ka jingthmu kaba 50 snem, khnang ba ki samla kin ïoh lad ban ïashimbynta ha ka jingtei ïa ka lawei.
U la ïathuh ba ha kine ki 8 snem ba la leit noh, ka Sorkar ka la pyntreikam ïa ki projek ha West Khasi Hills kiba shongdor jan T. 900 klur ha baroh ki bynta jong ka roi ka par. Ka jingbei tyngka kaba kum kane la pyntreikam ruh ha South West Khasi Hills, South Garo Hills bad East Jaiñtia Hills.