Ka jingtohkit ka khlem lap ïa kano kano ka jingjia, kumta la thung biang ïa u Syiem ka Hima Langrin: CEM

By Mawphor Editor On Oct 16, 2026

Shillong, Risaw 15: U Chief Executive Member (CEM) ka KHADC u Bah Winston Tony Lyngdoh u la ïathuh ba ka jingthung biang u Syiem bapura u Paiem Pynshngainlang Syiemiong ka long ba ka kaiphod ba la tohkit bniah da 1st Class Magistrate ka Council na Mawkyrwat ïa ki jingshah kynnoh la lap ba kam shym la don kano kano kaba shisha.
Ïa kane u la jubab ïa ka jingïatai ba la pynpaw da u MDC ka Langrin u Bah Puis Marwein hapoh ka Ïingdorbar Tlang jong ka KHADC kaba la kutnoh ha ka sngi Palei.
U MDC ka Langrin u la ïathuh ba ha u snem 2023 la don ka jingleh bakla jong u Syiem bad ha katei ka por ki khun ki hajar kiba la kot ha ka rta kaba 18 snem shaneng ki la pyrshah bad dawa ban wengnoh ïa u Syiem naba la don ka jingpyndonkam bakla ïa ka bhah jong ka Hima bad ïa ka bor bad ka EC barim ka la suspen bad ka thung ïa ka jingtohkit.
“Hynrei kane ka EC bathymmai mynta ka la thungbiang ïa u syiem Pynshngainlang bad kane ka long markhongpong ïa ka jingdawa jong ki khun ki hajar ka Hima ki bym kwah ïa u Syiem ban shim ïa ka 50% sha la ka jong ka ïing ka sem bad kiwei pat ki jingleh bakla,” ong u MDC ka Langrin.
Haba pynshai halor kane u CEM u la ïathuh ba hadien ba la wan ki jingujor bad katba dang bishar bniah ha ka 24.08.26 ki khun ki hajar ka Hima Langrin ki la leit kyrpad sha ka Meghalaya High Court bad na ka liang ka Council ka khlem lah shuh ban bishar ïa kine ki jingujor naba ki la leit sha Ïingbishar.
“Hynrei ha ka 8.10.26 ka High Court ka la pynkutnoh ïa kane ka mukotduma bad kumta mynta ka Council kan sa shim bishar biang ïa kine ki jingwan ki jingujor,” ïathuh u CEM kaba ong ba ka jingthung biang ïa u Syiem barim ka long katkum ka kaiphod jong ka 1st Class Magistrate na Mawkyrwat naba khlem lap ïa kano kano ka jingjia bad la thung biang katkum ka jingshem jinglap ka jingtohkit.
Halor ka bhah ba ka Hima Langrin ka la bynta haduh mynta u CEM ba ka Hima haduh mynta ka la ai ïa ka bhah jong ka sha ka KHADC hapoh ka jingsynshar jong u Syiem uba ka Council ka la thung biang.