La plie ïa ka Building, Library bad Smart Classroom ka Synod College ha Nongstoiñ

Nongstoiñ, Risaw 15: U Myntri Rangbah ka Jylla u Conrad Kongkal Sangma ha ka sngi Palei 15 tarik Risaw 2026, u la hiar sha Nongstoiñ West Khasi Hills Distirct na ka bynta ban plie noh ïa ka building thymmai jong ka Synod College kaba don ha Tiehsaw Nongstoiñ, lem ruh ryngkat bad ka College Library ba thymmai bad ka Smart Classroom.
Ha kane ka jingplie jong u Myntri Rangbah, la ïadonlang ruh u Myntri ka Sorkar Jylla u Bah Methodius Dkhar bad ki katto katne ki MLA na kane ka District, kiba kynthup ïa u Bah Gabriel Wahlang MLA ka Nongstoiñ bad u R.G. Momin MLA jong ka Rambrai Jyrngam.
Na ka liang u Myntri Rangbah haba kren ha ka jingïalang, u la ong ba ka sorkar jylla dalade ka la pynlut ha kine ki phra snem kiba lah dep, da kaba pyrkhat bad pynwandur biang ïa ka jinglong jingman jong ka pule puthi ha Meghalaya, naduh na ki jingpule ha ki skul shaduh sha ka kyrdan kiba heh.
U la ong ba ka pule puthi kadei ka u shabi ban kyntiew ïa ka roi ka par, ha kaba ka State Education Policy la pynwandur da ki riew shemphang ban shimkhia thikna ïa ki jingeh ha ka jaka ban pynleit jingmut tang ha ki jingkdew jong ka Percentage Pass jong ka Secondary School Leaving Certificate (SSLC).
Kum shi bynta jong ka jingwanrah ïa ki jingkylla, la pynbeit ryntih ïa ka rukom treikam jong ki skul, ha kaba la pynduna ïa ka jingdon ki skul na ka 14,000 sha ka 11,500 lyngba ka jingpynïasohlang bad ka jingwan thymmai, la ong u Myntri Rangbah.
Nalor nangta, haba pynpaw ïa ka jingpynïar ka Sorkar Jylla ïa ka Higher bad Technical Education, u la ong ba ka Meghalaya ka don kumba 10 tylli ki jaka pule Government Higher Technical bad College hashwa u snem 2018. Nangta sa 10 tylli ki jaka pule la nang mih shuh shuh ha kine ki 8 snem kiba la dep.
Kine ki kynthup ïa ka Shillong Engineering College, Captaiñ Williamson Sangma University, College of Architecture and Urban Planning, Shillong Medical College bad ka Science bad Commerce College ha Mahendraganj, Mawphlang bad Sohra bad kiwei kiwei.
U Conrad Sangma u la ong ba ka pule puthi ka ïoh pdiang ïa ka mang tyngka kaba heh duh ha ka jylla, ha kaba T.3500 klur lah mang na ka mang tyngka kaba shi snem jong ka Meghalaya kaba T.30000 klur.
U la ong ruh ba ka jingkylli kam dei ba ka don ka jingduna pisa, hynrei ka jingkylli ka long kumno la pyndonkam ïa ka bad kaei ka jingkylla kaba wanrah na katei ka jingpynlut.
Shuh shuh, u Myntri Rangbah u la kdew ba ka jingsam ïa ka Scholarship ka la jan kot ïa ka T.400 klur ha kine ki 12 bnai kiba la leit. U la pynpaw ba ka jingpyllait ïa ka T.100 klur shwa ka Khristmas ha u 2025, sa T.100 klur ha ka 27 tarik u Nailar 2026 bad T.104 klur ha ka 13 tarik u Risaw 2026.
Haba batai ïa ki jingeh ha ka jingwanrah ïa ki jingkylla ïa ka rukom treikam jong ka pule puthi, u Conrad Sangma u la pynsyriem ïa ka jinglaw ïa ki jingsoh kyrdot jong u waïar Headphone bad ban jur ïa ka jingdonkam ban long kiba ïaishah bad ban ïatreilang bad baroh kiba don bynta.
“Ka pule puthi ka long kum u waïar headphone u ba la sohkyrdot. Lada phi tan eh na kawei ka lïang ka jingsohkyrdot kan nang skhem bha. Phi hap ban law da ka jingjaijai uwei pa uwei, ban kynthup lang ïa baroh kiba donbynta bad ban pynduna ïa ka jingshah ktah.Kane ka dei ka rukom leh kaba ngi lah shim”, u la ong.
U la bynrap ba ki don katto katne ki projek kiba la mynjur watla haba ïa ki tyllong jong ka jingbei tyngka ka dei ka bym shim la pyllait mardor ïa ka pisa, kaba donkam ïa ka sorkar ba kan leit mih sha ki bor jong ka sorkar pdeng bad sha ki tnad Sorkar ban wad ïa ki lad ban ïoh ïa ka jingbei tyngka.
U Conrad Sangma u la pynthikna ïa ka Governing Body jong ka Synod College, ba ka Sorkar Jylla kan trei bad ka jaka pule ban shimkhia ïa ka jingdonkam ka jong ki, kynthup ïa ki jingtei bad ki kam kiba ïadei bad ka jingeh ha ka ban siew ïa ka tulop.
“Phim dei ban khuslai haba kaei kaba phi leh ka long kaba dei. Phi leh ïa kaba bha na ka bynta ka imlang sahlang, na ka bynta uwei pa uwei u khynnah u bym lah ban ïoh ïa ka kabu ban pule ha kum kane ka jaka pule. Ngim lah ban shna ïa ka jaka pule tang hapoh ka shi miet, ngin mad ïa ki jingeh ha ka jingsiew tulop bad ki jingtei, hynrei ngin wad ïa ka lad bad lynti”, u la ong.
U Myntri Rangbah u la ïaroh ruh ïa u Rev. S.S. Majaw bad ïa ka Balang Presbyterian halor ka jingnoh synñiang sha ka pule puthi ha Meghalaya da kaba ong, ba ki kam kaba ki trei ka long ban ai ïa ka jingshakri na ka bynta ka bha ka miat jong ka imlang sahlang.
Ka jingtei kaba thymmai, Library bad Smart Classroom, ka dei kaba la khmih lynti ban pynkhlaiñ ïa ki jingtei jong ki jaka pule jong ka Synod College bad ruh ban pynbiang shuh shuh ïa ki jingdonkam na ka bynta ki samla ha kylleng jong ka thaiñ West Khasi Hills.