Shillong, Risaw 15: Ka sienjam ba nyngkong jong ka lympung ïalehkai Mawpoiñ ba la tip da ka ‘1st Open Inter School & Inter College Mawpoiñ Championship 2026’, ba la pynlong da ka Seng Samla Seng Khasi Kmie, ha Madan Heh Stadium, Mawlai Phudmuri ka la poi noh sha kaba kut hynne ka sngi Palei.
Baroh ki jingïakhun phainal la ïoh ban pyndep hynne ka sngi ha kaba ki khynnah shynrang jong ka Seng Khasi Riwar Mihngi HSS-Pynursla ki la rah ïa ka nam lahduh jong ka Inter School da kaba pynliem noh ïa ka Seng Khasi Higher S.S-Jaiaw, katba ka Seng Khasi SS Umkseh-Tyrsad ka la jop ïa ka nam lahduh ha ka liang ki kynthei da kaba pynliem ïa ka Seng Khasi HSS-Shillong.
Ha ka kyrdan ïakhun Inter College, ka Seng Khasi College ka la pynliem noh ïa ka UCC, Umiam-Ribhoi ban rah nam lahduh ha ka liang ki shynrang, katba ka Synod College ka la pynliem noh ïa ka Ri War College-Pynursla ban rah nam lahduh ha ka liang ki kynthei.
Baroh saw tylli ki kynhun ba ïohrah ïa ka nam lahduh ki la ïohpdiang ïa ka khusnam pisa kaba Rs-30000 bad ka trophy, kumjuh ruh na ka bynta ki kynhun ba wan ha ka kyrdan ki la ïohpdiang ïa ka trophy ryngkat ka khusnam pisa kaba Rs-15000.
Nalor ki khusnam lahduh, la ïoh ruh ban sam ïa ki khusnam shimet sha ki nongïalehkai ba kynsai tam ha kaba u Jefferson Thabah jong ka Seng Khasi College bad ka Ribakmen Nongbet jong ka Synod College ki la khur ïa ka nam Best Player ha ka kyrdan ïalehkai Inter College, katba u Bapyntngen Mawlong jong ka Seng Khasi Riwar Mihngi HSS, Pynursla bad ka Ebattikordor Umdor jong ka Seng Khasi School Umkseh Tyrsad ki la khur ïa kane ka khusnam ha ka kyrdan Inter School.
Ha kane ka sngi la wan kongsan da u Abhilash Baranwal, IAS, Deputy Commissioner, East Khasi Hills District, ha ka jingïadonlang u Vice President Seng Khasi Kmie bah PD Nongrum bad bah DL Nongbri, President Seng Khasi Kmie – O. Pyngrope, Kong Meril Nongsiej, Secretary, Governing Body, Seng Khasi College, nalor kiwei kiwei.
Kumban shu pynkynmaw, ïa kane ka Championship kaba saw sngi lynter la kyrshan da ka tnad Sports jong ka Sorkar Meghalaya, bad la sdang ïa ka naduh ka 12 tarik u Risaw da ka jingwan plie pyrda da u Symbud Myntri Rangbah ka jylla bah Prestone Tyngsong.
