ïaid shakhmat ka State Sub Junior Boxing C’ship jong ka MBA; Pyni sap nylla ki khynnah ïalehkai

Shillong, Risaw 15: Ki khynnah shynrang bad kynthei hynne ka sngi Palei ki la kiew rynsan ryngkat ka jingïakhun kaba tyngeh kum shi bynta ban poi sha ka thong bad ban khur ïa ka nam jop ha la ki jong ki kyrdan ïakhun bad jingkhia bapher bapher jong ka lympung ïakura ba la tip da ka ‘State Sub Junior Boy’s & Girls U-15 Years Boxing Championship’.
ïa kane ka lympung kaba lai sngi lynter la pynlong da ka Meghalaya Boxing Association (MBA), ha madan ïalehkai Basketball jong ka Raid Laban College, ha Madan Laban Shillong da ka jingkyrshan bad bei pisa da ka tnat jong ka Directorate of Sports & Youth Affairs ka sorkar Meghalaya.
Ki resol jong ki jingïakhun kiba dei artad ki semifinal ba la long hynne ka sngi ki long: Ha ka kyrdan ïakura kaba 30-33 kg u Daniel Nongrum bad u Safal Thapa ki la jam sha ka phainal hadien ba ki la pynliem noh ïa u Dame Syiemlieh bad Inam Vianney Nongkhlaw.
Nangta u Bantei Rani bad Steven Khyllep ki la poi phainal ha ka kyrdan ïakhun kaba 38-40kg da kaba pynliem noh ïa u Milando bad ïa u Reform Talang.
Ka jingiakhun ha ka kyrdan jingkhia kaba 40-42kg, u Ethan Nongdhar bad u Banlang Lyngdoh ki la ïoh ban jam shakhmat hadien ba ki la pynliem noh ïa u Omega Nongjri bad Jakrikra R, Mrak; nangta ka kyrdan 44-46 kg pat, ki rangïakura ba la lah ban buh jaka ïalade sha ka phainal ki long u Debraj Thapa bad u Shandor Kharchandi hadien ba ki la lah ban pynliem noh Chara Dechao R Marak bad ïa Tangrik.
Ha ka kyrdan ïakhun kaba 46-48kg pat u Florian Kharjana bad Irfan Nongrang ki la jam sha ka phainal hadien ba ki la lah ban pynliem noh ïa u Kabibath bad ïa u Denzil Myrthong.
Haba phai pat sha ka kyrdan ïakhun kiba 48-50kg u Samha o Mulieh bad u Ariri Ch Momin ki la jam sha ka phainal hadien ba ki la pynliem noh ïa u Rohan Kumar Ray bad ïa u Bamekordor Majaw, katba u Rudolf Lyngdoh bad Damebala-ai Janai Ksiang ki la jam sha ka phainal hadien ba ki la lah ban pynliem noh ïa u Arnav Rai bad ïa u Chiangrik ha ka kyrdan jingkhia kaba 54-57kg.
Haba phai pat sha ka jingïakhun jong ki kynthei; ha ka kyrdan kaba 42-46 kg, ka Tariasa Marak ka la jam sha ka phainal da ka jingjop pyrshah ïa ka Samki Phawa.
Ka jingpynlong ïa kane ka rynsan ka long kum shi bynta ka thong jong ka MBA ba kan lah ban lap bad shem ïa ki sap ïakura ba nylla jong ki khynnah shynrang bad kynthei, kiban bteng ban long ka lawei jong ka jingïalehkai ïakura ha kane ka jylla.
Ha kane ka rynsan ïakura, ki klob kiba la mih shakhmat ban sei madan ïa la ki nongïalehkai ki long ka Green Heart Boxing Club, Rising Star Boxing Association, Noble Art Boxing Club, Mawshbuit Boxing Club, Upper Shillong Boxing Association.
Bad na ka liang ki district pat kiba la wan ïashim bynta ki long ka Boxing Association of East Khasi Hills, West Jaintia Hills Boxing Association, Eastern West Khasi Hills District, Ri-Bhoi, West Garo Hills, North Garo Hills bad ka East Garo Hills.