Ka kam nongïalam liang pyrshah ha KHADC kan neh kumjuh watla 2 ngut ki MDC kila leit sha BJP

Shillong, Risaw 14: U Chairman jong ka Khasi Hills Autonomous District Council (KHADC) u Bah Strongpillar Kharjana u la pynpaw ba ka ïa kam nongialam liang pyrshah kan neh beit kumjuh, wat hadien ar ngut ki MDC ka UDP kila leit ban pyniasoh sha ka BJP.
Kum ban shu kdew ba ka UDP ka don mynshwa san ngut ki MDC, hynrei namar ba u MDC ka Ranikor u Bah Pius Marwein bad u Bah Synshar Kupar Lyngdoh u MDC ka Sohiong kila leit ban pynïasoh noh bad ka BJP mynta kila don satang lai ngut.
Katba ka National People Party (NPP) kaba don lang ha ka liang pyrshah kala kiew noh ha ka jingbun paidbah da saw ngut.
Haba kren bad ki lad pathai khubor u Bah Kharjana u la ong wat lada ar ngut ki MDC ka UDP kila leit ban pynïasoh sha ka BJP, hynrei ka kam nongïalam ka liang pyrshah kan dang neh beit kumjuh.
“Kan neh beit kumjuh ka kam nongïalam ka liang pyrshah namar ba u Lamphang ka ïing Dorbar thaw aiñ ka Jylla u dang bishar bniah ïa kane ka jingphet ki MLA kiba dei ruh ki MDC sha ka BJP” ong u Bah Kharjana.