Ban lait na ka jingsniew u ‘Duma’ pynlong jingïalang ka tnad DM&HO ha Jowai

Jowai, Risaw 14: Ka ophis jong ka District Medical and Health Officer, West Jaiñtia District kala pynlong mynta ka sngi 14 tarik u Risaw ïaka prokram ha kaba ïadei bad ka ‘World No Tobacco’ halor ka phang kaba ong “Unmask the appeal-Countering Nicotine and tobacco addiction” kaba la long ha Chutwakhu Community Hall, Jowai. Ha kaba ka kong Emelya Ch Momin, MCS Assistant Commissioner WJHD kala long kum ka kongsan, kaba la sam ruh ïa ka khusnam sha ka ophis u SP kum ka jingithuh ïa ka jingnoh synñiang ban pyntreikam ïa ka COPTA.
Ha kane ka prokram la wan ban donlang da u Additional SP u Jason Mairom, u OC Jowai PS W. P. Nongtdu, Sub-Inspector of School ophis DSEO u H.C. Lamin, u Advocate M. Najiar, DLSA, MVI ma B. Sutnga, ha ryngkat ki ophiar ka tnad Koit ka Khiah, ki nonghikai bad ki khynnah skul na ki 8 tylli ki skul kiba don kylleng ka District.
Ka Emelya Ch. Momin haba ai jingkren kala pynsngew ba ka jingdih duma bunsien ka sdang naka jingkwah tang ban mad, ka jingpynbor jong ki paralok kaba lah ban ïalam suki suki sha ka jingkyrni. Da kaba pynksan ba ka jingïada ka kham bha ban ïa ka jingpynkoit, kumta kala pynshlur ïa ki samla pule ban kiar na kine ki jingdih basniew, khnang ban ïoh ïaka met kaba koit ba khiah.
Kala pynkynmaw ïaka jingpyrta kaba ong “To long kiba stad, Wat Sdang.” bad kala kyntu ban pynsngewthuh lang sha kiba haïing hasem, ki paralok bad ha ki shnong ki thaw. Haka juh ka por kaba pynpaw ka jingsngewnguh ïa ka jingtrei shitom jong ka tnad ka Koit ka Khiah, ka tnad Pule Puthi bad ka tnad Pulit ban ïakhun katba lah ba ka jylla kan lait na u Duma.
Kiwei de kiba ai jingkren shaphang ka jingsniew jong u duma bad ban kiar katba lah ki kynthup ïa u Additional SP bah Jason Mairom, u ma H.C Lamin, Sub Inspector of School, DSEO, Dr. R. Talang, District Nodal Officer, National Tobacco Control Programme (NTCP) bad u Advocate M. Najiar uba la kren halor ka Cigarettes and Other Tobacco Products Act (COTPA), 2023.
Ha kane ka sngi la sam ruh ïa ka khusnam Best Performer Awards sha ka Jowai Police Station bad Umplong Camp kum ka jingithuh ïa ka jingtrei shitom jong ki ban pyntreikam ïa ka aiñ ban khanglad ïa u duma. La sam ruh ïa ki khusnam sha ki khynnah skul jong ka kyrdan Primary, Upper Primary, Secondary bad Higher Secondary kiba la ïashim bynta ha ki jingïakop bapher bapher, ka jingïaid rally bad ki jingïasoi kyrteng ba la pynlong haka District bad ki Block Levels.
Hashwa kane ka Dr. P. Shylla kaba dei ka District Medical and Health Officer kala ai ki kyntien pdiang burom, katba ka Loomkyrwiang Urban Primary Health Centre (UPHC) kala ai ka jingrwai pdiang burom.
La pynshongshit shuh shuh ïa kane ka prokram da ka jingïaphylliew jingmut bala ïalam da ka kynhun ‘Chi Iung’ bad la pynïaid da u Kynpham Lamurong. La don ruh ki jingtem tynrai na u Same Shullai ha ryngkat ka jingrwai, ka jingshad bad ka skit naka kynhun Chi Iung. La pynlong ruh ïa ka jingïakop kyntip kyllum lang kaba pynshlur ïa ki samla pule ban ïashim bynta shitrhem.