Nongpoh, Risaw 14: U MLA ka Nongpoh Constituency, u Bah Mayralborn Syiem, mynta ka sngi u la buh ïa u mawnongrim ban sdang ïa ka jingtei ïa ka building thymmai jong ka Umsaw Nongbri Government LP School, kaba don ha ka shnong Umsaw Nongbri, Ri-Bhoi District.
Ïa kane ka project ban tei ïa ka building thymmai jong katei ka skul la mang pisa haduh 70.18 lak, lyngba ka skhim Mission Education jong ka tnad pule puthi ka sorkar jylla, da ka jingthmu ban kyntiew ïa ki jingtei bad pynbha ïa ka jinglong jingman jong ka jaka pule ki khynnah skul.
Ha kane ka sngi, la sakhi lang ïa kane ka jingïalang da u Deputy Commissioner ka Ri-Bhoi District, u Dr. Abhishek Saini, kum u symbud kongsan, u P.P. Yadav, SDSEO ka Ri-Bhoi, u Bah Mission Tron, Rangbah Shnong ka Umsaw Nongbri, ryngkat ki nongïalam balang, ki riew rangbah bad ki nongshong shnong.
Shuh shuh, ha kane kajuh ka sngi, u MLA u la plie paidbah ruh ïa ka Auditorium Hall jong ka shnong Umsaw Nongbri, kaba long kawei na ki jingtei ban ai jingmyntoi ïa ki paidbah bad ban pynsuk ïa ki jingïalang bad ki kam shnong bapher bapher.
Nalor kata, u Bah Mayralborn Syiem u la aiti ruh ïa ka work order kaba T. 11 lak lyngba ka skhim SRWP, na ka bynta ban nang pynheh bad pynbha shuh shuh ïa katei ka Auditorium Hall, khnang ba kan lah ban shakri kham bha ïa ki paidbah jong ka shnong.
