Mairang, Risaw 14 : U Superintendent of Police ka Mairang, Eastern West Khasi Hills District ha ka jingpynlait khubor, u la pyntip paidbah ba ka District & Session Court, West Khasi Hills Nongstoiñ ka la rai pynrem ia u Donbor Paliar ha kaba ia dei bad ka Mairang PS Case No.42(11)2020 bad la rai pynrem ia u da kaba set phatok 10 snem. Ia kane ka kam la tohkit da ka WPSI Kong R.R Marak jong ka Mairang Police Station hadien ka FIR kaba la ujor pyrshah ia u ha ka 22 tarik u Naiwieng 2020.
Ka Ïingkashari ba donburom ka la pynrem ïa u Donbor Paliar katkum ki kyndon ain 376(1), 363, 342 bad 506 IPC bad la rai pynrem da ka jingshah set phatok kaba 10 snem, 7 snem, 1 snem bad 2 snem, ryngkat ka kuna kaba long 70,000 tyngka.
Da kaba pyrkhat halor ka jingjia ka ba shyrkhei kaba la wan jia ha ka lanot, na ka liang ka Ïingkashari ka la pynioh ruh ïa ka bai lutksan kaba kot 3,50,000 tyngka sha ka lanot kaba la lait im katkum ka Meghalaya Victim Compensation Scheme, 2019.
Ki pulit jong ka Eastern West Khasi Hills District ki la pynskhem ia ka jingangnud jong ki na ka bynta ka jingshngain bad jingiada ia ki kynthei khynnah bad ban pynthikna ba ia ki kam runar pyrshah ia ki kynthei, yn tohkit bniah khnang ban pyn ioh ia ka hok jong ki.
