Shillong, Risaw 14: Ka bor pyniaid district jong ka East Khasi Hills, ka la bthah ban pynlong ïa ka jingtohkit majisterial halor ka jingkynnoh dawa pisa da ki pulit ha kawei ka jaka talasi, kaba la paw pyrthei ha ka sting operation jong ka Khasi Students’ Union (KSU).
U Deputy Commissioner (DC) u Abhilash Baranwal u la ong ha ka sngi Balang ba katba ki pulit ki dang ai ïa ka kaiphod jong ki, donkam ïa ka jingtohkit kaba laitluid ban sngap ïa baroh ki liang.
“Ngi la thung da ka jingtohkit magisterial ha kaba ïa dei bad kaei kaba la jia, ka video kaba baroh ki la iohi, u SP ka East Khasi Hills u la dep ban aiti ïa ka kaiphod jong ka, ka kaiphod na ki pulit ka dei tang kaba mihkhmat ïa ka liang na ki pulit”, la ong u bah Baranwal.
U la ong ba la shaniah ha uwei u Additional District Magistrate ba rangbah ban tohkit.
“Nga la dep thung ïa ka jingtohkit majisterial hapoh ka jingpeit u wei u ADM ba rangbah, uba la aiti ïa ka jingkitkhlieh ban aiti ïa ka kaiphod kham kloi haduh ka 31 tarik u Risaw,” u la ong.
U DC u la ong ba kane ka jingtohkit kan bishar bniah ïa ki jingkren jong ki nongujor, ki pulit bad ki nongkit mar ne ki trok draibar.
“Kane ka jingtohkit magisterial kan shim ïa ki jingkren na ki nongmudui, na baroh arngut kito kiba la leit sha ka jaka talasi, bad kaba shai ba kita ki pulit, bad lehse na kiwei pat ki nongkit mar ne ki trok drabar. Man la u nongshim bynta, uno uno uba donkam ban shah khot bad kylli jingkylli, ka jingtohkit magisterial kan pynthikna ba kan long kaba dei bad kaba bniah, bad kan wanrah ïa ka jingshisha mano ba donkti,” bynrap biang u Baranwal.
