Tang khyndiat ki jingduna kiba rit lap ka IIT Guwahati ha ka ïingdorbar thymmai: Pyntip u Lamphang

Shillong Risaw 14 : U Lamphang ka Iingdorbar Thaw Aiñ ka Jylla, u Thomas A Sangma, u la ong ba ki Professor na ka IIT Guwahati ki la wan ban peit bniah dang shen ïa ka ïingdorbar Thaw Aiñ kaba thymmai ha Mawdiangdiang bad ki la kdew ïa ki katto katne ki jingduna kiba rit, ha kaba ka jingpynbeit ïa ki ka la sdang.
“Dang shen, na ka bynta ka jingtip jong phi, ki professor na ka IIT Guwahati ki la wan ban peit bniah ïa ka jingpyntrei ia ka ïingdorbar bad ki la ai jingmut halor katto katne ki mat kiba rit bha, bad ka jingpynbeit kaba donkam ka la sdang lypa,” u la ong haba kren bad ki lad pathai khubor.
U la ong ba ka jingpeit bniah ïa ka jingshngaiñ ruh ka dang ïaid ha kajuh ka por, namar ynda la dep buh ïa ka sad (ceiling), yn sa tap ïa ka bynta shapoh jong ka ïing.
“Em, ïa kane ruh la leh ha kajuh ka por. Wat mynta ruh ka dang ïaid, namar ynda la tap ïa ka sad, ngin ym ïoh shuh ïa ka lad ban rung shapoh ban pynlong ïa ka jingpeit bniah ïa ka jingshngaiñ. Kumta, ïa kane la leh ha kajuh ka por,” la ong u Lamphang.
Haba kren halor ka jingpyntrei ïa ka ïingdorbar, u la ong ba ki bynta jong ka jingtei sha ka mon bad sha ka diang ki la dep lut, bad sa tang ka main hall, ka tnum (dome) bad ka sad kaba don ïa ki jingdro bad jingpynitynnad kiba pyni ïa ka kolshor tynrai kiba dang sah ban pyndep.
“Ka kam ka dang ïaid shakhmat bad ka dang don hapoh ka por ba la buh, hynrei ki la don katto katne ki jingjia kiba ym lah ban tip lypa. Ngi kyrmen ba yn lah ban pyndep hapoh une u snem. Ka jinghap jong ka dome kaba mynshwa ka dei ka daw kaba kongsan jong ka jingpynslem, namar ngi hap ban ap ïa ka jingmynjur ïa ka design kaba thymmai na ki IIT,” u la ong.
U Sangma u la pynskhem ba haduh mynta ym pat don kano kano ka jingkiew jong ka jinglut pisa jong ka projek, bad u la pynpaw ïa ka jingkyrmen ba kan ym jia shuh kano kano ka jingjia kaba sngewsih.
“Nga kyrmen ba kan ym jia shuh kano kano ka jingjia kum kata, khamtam ha ka por jong nga. Ka jingshngaiñ ka long kaba kongsan bha,” u la ong.
Haba kren halor ka bynta kaba ar jong ka projek, u la bynrap ba la dep phah ïa ki jingtyrwa sha ka Sorkar Pdeng bad la ïoh ïa ka jingpynpaw kaba bha halor ki.