Khlem ailad u Lamphang ban ïakren halor ka Land Bill ba pynphai u Lat sha KHADC

Shillong, Risaw 14: U Bah Strongpillar Kharjana uba dei u Chairman jong ka Khasi Hills Autonomous District Council (KHADC) haba jubab ïa ka Point of Order ba la wanrah da u MDC ka Mairang u Bah Eqator Nongrang ha ka sngi sdang jong ka dorbar Tlang u kyntait ban ïa kren halor ka Land Amendment Bill ba la pynphai da u Lat ka jylla sha ka KHADC, da kaba u la kam ba kadei tang kaba shu mih ha ki kot khubor.
“Ngam shim ba ka long kaba shisha namar ba ka shu mih tang ha ki kot khubor namar ba ka ophis pat kam pat ioh pdiang da ka shithi halor katei ka bynta, kumta ngam shah ban ïa kren halor kane ka bynta namar ba ym lah ban pynshisha” ong u Chairman.
Na ka liang u Bah Nongrang tang shu kut ka kynta kylli jingkylli u la ieng bad wanrah ïa ka Point of Order ban kylli ba balei ym shym la shah ban ïa kren ïa ka Bill kaba la pynphai noh da u lat ka jylla kumba la paw ha ki lad pathai khubor namar kum ki dkhot ka ïing dorbar ki don ïa ka bynta ban ioh ban ïa kren.
Haba kyrshan ïa ka jingkren jong u MDC ka Mairang u bah Equador u MDC ka Laban u bah Ricky Shullai u la ong ba katkum ka rule ki dkhot ka ïing dorbar ki kwah ban tip namar ki kot khubor haba ki thoh ki da thoh ïa ka kyrteng jong u Symbud Myntri Rangbah ka jylla u bah Prestone Tynsong uba bat ïa ka tnad District Council Affairs (DCA).
U Chief Executive Member u bah Winston Tony Lyngdoh haba jubab ban pynshai ia ka Point of Order u la ong ba u shongknor ka iing dorbar u la dep ban kren shai ba kam shym pat don kano kano ka jingthoh kaba wan sha ophis te kumta yn ym lah ban shim ba ka dei kaba shisha tangba ka mih ha ki lat pathai khubor.
Kane ka dorbar Tlang jong ka Khasi Hills Autonomous District Council kaba ar sngi kala sdang mynta ka sngi ka 14 tarik u Risaw bad ka kut lashai ka sngi ka 15 tarik u Risaw.