Shillong, Risaw 14: Ka jylla Meghalaya kan ïoh ïa ka lad ban pynlong ïa ka sienjam kaba san (5th) jong ka lympung KIO North East Zone Karate Championship 2026 ha nongbah Shillong naduh ka 22 haduh ka 24 tarik Risaw.
ïa kane ka lympung la pynïaid da ka Karate India Organisation (KIO), bad yn sa pynlong ïa ka da ka All Meghalaya Karate-Do Association (AMKA) ha ryngkat ka jingkyrshan jong ka Directorate of Sports and Youth Affairs jong ka sorkar Meghalaya. ïa kane ka lympung kaba lai sngi lynter yn pynlong ha Convocation Hall jong ka North-Eastern Hill University (NEHU) Shillong.
Kane ka jingïakob kan pynïasoh lang ïa ki nongïalehkai karate na kylleng ka thaiñ shatei lammihngi jong ka ri India, kaba plie lad ïa ki samla bad ki nongïalehkai karate ban sei madan ïa ka sap, ka mynsiem ïakhun, ka jinglong ryntih bad ka mynsiem ïalehkai ba ki don ban pynpaw.
La khmih lynti ba kane ka lympung kan sakhi ïa ki 899 ngut ki nongïalehkai, ki coach, ki referee bad ki team official ki ban mihkhmat ïa la ki jong ki jylla ha kane ka jingïakob kaba heh.
Kane ka jingïakob ka thmu ban kyntiew bad pynkhlaiñ ïa ka jingïalehkai karate ha ka thaiñ Shatei Lammihngi, ban pynshlur ïa ki samla ba kin nang tbit ha ka jingïalehkai bad ban ai ïa ki ïa ka jingshemphang kaba kordor ha ka rynsan ïakhun jong ka kyrdan zonal. Kan long ruh ka lad kaba kongsan na ka bynta ki nongïalehkai ban bishar bñiah ïa ka jinglah jong ki bad ban pynkhreh na ka bynta ki lympung ïalehkai kiba kham heh, kum ka 39th National Games, kaba ka Meghalaya kan pynlong ha u snem ban wan.
Ki nongïalehkai karate jong ka AMKA ki la wanrah ïa ka nam bad ka burom sha ka jylla ha kiba bun ki khep ha kine ki snem ha ki lympung ïalehkai jong ka thaiñ, ha ka ri bad ha ka pyrthei.
La khmihlynti ruh ba ki nongïalehkai karate ba tbit na ka jylla Meghalaya kin ïashimbynta ha kane ka taïew ka ban sa wan bad ngin kyrmen ban pynurlong biang ïa ka jingjop ba ki la ïoh mad shawei ha kane ka lympung ban long ha la ïing, ryngkat ka jingkyrshan jong ki paralok bad ki bahaïing hasem.
