Shillong, Risaw 14: Ka Meghalaya Boxing Association (MBA) sa shisien pat ka la lah ba kan pynlong biang ïa ka State Sub Junior Boy’s & Girls U-15 Years Boxing Championship, ha kut jong ka Raij Laban College, Madan Laban. ïa kane ka jingiakob la lah ban pynlong da ka jingiarap ban bei pisa ia ka da ka tnat jong ka Directorate of Sports & Youth Affairs ka sorkar jylla.
Haba ai ia ka jingkren maitphang halor kane ka lympung, u Techinical Director ka MBA-bah Larry Kharpran, u la pyntip ba ki don 7 tylli ki District bad San tylli ki klob kiba la wan ban ïashim bynta sha kane ka jingïakob, ba kynthup 54 ngut ki khynnah shynrang bad 17 ngut na ka liang ki khynnah kynthei.
La plie pyrda ïa kane ka jingïakob da u Secretary ka Dorbar Shnong Madan Laban & Riat Laban-bah R.G Marbaniang ha ka jingïadon lang u President ka MBA-bah Cornilius Kharhunai lem bad ki dkhot nongkit kam ka MBA, ki nongïalam ka Noble Art Boxing Club.
Ha ka sngi sdang ki la don haduh 15 tylli ki jingïakhun ba kynthup ïa 11 tylli ki Quarterfinal bad saw tylli ki semi-final.
Ki khynnah kiba la ïoh khur ïa ka jingjop ki long:
U Daniel Nongrum (BAEKHD) uba la jop ha ka 30-33KG, ha ka kyrdan 40-42KG ki nongjop ki long u Omega Nongjngi (WJH), u Ethan Nongdhar (NBC), Jakrika R Marak (WGH) bad u Banlang Luyngdoh (Ri-Bhoi).
Ha ka kyrdan ïakhun kaba 44-46 kg, nongjop ki long Debraj Thapa (RSBA), Shandor Kharshandi (NBC) bad u tangrik (EGH). Katba ha ka kyrdan ïakhun 46-48 kg, ki nongjop ki long u Florian Kharjana (GHBC), u Denzil Myrthong. Ha ka kyrdan ïakhun kaba 48-50 kg ka nam jop ka leit sha u Samha-0-Mulieh (WJH).
Ki resol na ka jingïakhun ka semi-final pat ka long ba ha ka kyrdan jingkhia kaba 28-30 kg ki nongjop ki long u Wanmi Kharkongor (USBA) bad Marcilino Rimen (BAEKHD), bad ha ka kyrdan ïakhun kaba 36-38 kg ki nongjop ki long U Kitbok Shabong (BAEKHD) bad u Elegant Shadap (Ri-Bhoi).
Kane ka lympung jong ka MBA kan ïaibteng biang ha kane ka sngi, ha kaba kin don bun tylli ki kyrdan ïakhun bapher bapher jong ki khynnah shynrang bad kynthei.
