Shillong, Risaw 14: Ka Sikkim ka la ïakhun tyngeh tang ban ïakhaid bad ka Meghalaya ha ka sngi ba saw bad kaba khatduh jong ka jingïalehkai plate group hapdeng jong ki ha ka Ranji Trophy 2026-27 ha Rangpo, Sikkim, hynne ka sngi Balang.
Haba sdang biang na ka 44/0, ka Sikkim ka la duna 106 ron ban pynlong ïa ka Meghalaya ba kan tied biang, da kaba pynkut ïa ka sngi da 291/7, kaba la pynthikna ba ka jingïalehkai kan kut noh da ka jingïakhaid. Ka Meghalaya ka la khur 3 poiñ bad ka Sikkim 1 poiñ.
Haba phaidien, ka Sikkim ka la kamai 245 ron ha ka inning ba nyngkong ïa kaba ka Meghalaya ka la jubab da 395 ron.
U Abhishek Kumar u la long u nongkawang bol ba seisoh tam hynne ka sngi, ha kaba u la weng noh ïa ki lai ngut ki nongtied ba nyngkong ban pynsah ïa ka Sikkim da 67/3. Hynrei u Parth Palawat (66) bad u Gurinder Singh (100 not out) ki la ïatreilang ban kamai 109 na ka bynta u wiket uba saw ban pynkhie im ïa ka jingïakhun.
U Gurinder, uba la ïalehkai mynshwa na ka bynta ka Meghalaya kum u guest player, u la long uba kongsan ha ka jingpyrshang jong ka Sikkim bad u la ïaineh haduh ban da kut ka jingïalehkai.
U Ram Gurung, uba la khur 5/32 ha ka inning ban nyngkong, u la khur 2/40 ha ka inning kaba ar bad u la khur syndon ïa ka khusnam ‘Player of the Match’. U la pynkut ïa ka jingïalehkai ryngkat ka jingkheiñ da 7/72. Uwei pat u rangïalehkai ka Meghalaya uba don ha ka thup ba lah ban khur ïa kane ka khusnam udei u Jaskirat Singh Sachdeva, uba la kamai 127 – kaba dei artad ka spah ron kaba nyngkong jong u ha ka Ranji.
Ka jingïakhun ban wan jong ka Meghalaya kan long ha ka 18-21 tarik Risaw ha Shillong pyrshah ïa ka Manipur.
