Khang khyrdep ka JNC ïa ki dukan jong ki bar jylla ha Khliehriat ki bym biang kot

Khliehriat Risaw 13: Ki dkhot jong ka Jaiñtia National Council hapoh ka jingialam u General Secretary, u bah Wanshwa Suting, mynta ka sngi ki la pynlong ïa ka jingkhynra kot ha ki dukan jong ki briew kiba na bar jylla kiba don dukan ha Khliehriat bad ka seng ka la lap ba don bun ki dukan kiba khlem biang ki kot ki sla bad ki la khang khyrdep noh bad bthah ïa ki trai dukan ba ki dei ban pynbiang shwa ïa ki kot ba donkam kum ki Trading Licence, Labour License.
Haba ïakren bad ki lad pathai khubor, u General Secretary ka JNC-CEC, u la ïathuh ba kane ka jingleit jurip ka dei hadien ba lah iohi ïa ka jingbun palat ki briew ba na bar kiba pynïaid ïa ki dukan bad ki kam khaii ha East Jaiñtia Hills. Ka jingthmu ba kongsan jong ka seng ka long ban pynshisha la kine ki dukan ba pyniaid ne ki jaka treikam jong ki bar jylla ki don ne em ïa ki laisen bad ki kot ki sla kiba biang.
“Ka jingbym don ïa kum kine ki laisen bad ki kot ki sla ka dei kawei na ki daw bah kaba la pynlong ïa ka jingduh khajna bad ka JHADC”, la ong u bah Suting bad bynrap ruh ba kum kine ki rukom ki ktah ym tang ïa ka khajna jong ka JHADC hynrei ka wanrah ruh ïa ka jingeh kaba khraw ïa ki briew kiba dei ki trai ri, khamtam ha kaba ïadei bad ka jingshah knieh ïa ki kam ki jam, ki kam khaïi kiba ki trai muluk ki dang lah ban trei ne ban leh.
Na ka liang ka seng ka la ong ruh ba ïa kane ka jingjurip la leh katkum ka kyndon jong ka JHADC Trading by Non-Tribal Rules, 2015, ha kaba la don lang ruh bad sakhi da ki nongtrei jong ka JHADC.
U Bah Wanshwa u la pynpaw shuh shuh ba ïa kito ki dukan bad ki jaka treikam kiba don ïa ki laisen khaïi kiba biang hynrei ki bym don pat ïa kiwei kiwei ki kot ki sla ba donkam, ka seng ka la ai por shi taïew ba kin pynbiang ïa ki kot kiba donkam ban leh kiba na JHADC bad maham ruh ba lada kim lah ban leh hapoh ka por ba la buh, ka seng kan sa pynshitom da kaba tyngeh.