Palat 8 lak tylli ki vote un ïoh u Dr. Batskhem ha ka elekshon shiteng samoi sha Lok Sabha: Bah Ardent
3 lak tam synniang ki nongkyrshan VPP ïa u Dr. Myrboh
Shillong, Risaw 11: U President ka Voice of The People Party u Bah Ardent Miller Basaiawmoit u la kob ba u Dr. Batskhem Myrboh uba dei u kyrtong jong ka Party ban ïakhun ïa kane ka elekshon shiteng samoi sha ka Parliament na Shillong Parliamentary Constituency un ïoh jingjop da kaba suk bad un ïoh ruh palat 8 lak tylli ki vote ha kane ka elekshon shiteng samoi.
Ha kane ka sngi na ka liang ki nongkyrshan ki la lum bad nohsynniang da ka pisa kaba la poi palat T. 3 lak 7 hajar, 9 spah, 52 ban kyrshan ïa u Dr. Batskhem ban pynlut ha kane ka elekshon bad ïa kane ka song pisa la aiti da u President Bah Ardent sha u Dr. Batskhem ha kaba na ka liang u kyrtong u la kular ban pyndonkam hok ïa kane ka pisa bad lada ka tam pat ïa kane ka pisa un sa aiti sha ka party ka ban sa pynïaid ïa kane kaba la ai sngewbha da ki nongkyrshan.
U nongïalam ka seng haba kren ha kane ka sngi u la ïathuh ba ka jingieid jong ki paidbah ïa u (L) Dr. Ricky AJ Syngkon da kaba ai ka jingjop palat 5 lak tylli ki vote ka la long kaba myntoi shibun bha naba kane ka pyni ka jingieid jong ki ïa une u nongïalam uba la leit noh shwa na kane ka pyrthei kaba ka seng kam pat shym la klet satia haduh mynta.
“U Dr. Ricky u la leit noh bad U Blei u la khot noh ïa u sha lade hynrei une u nongïalam pat hadien ba u la khlad noh u khlem kit lang satia ïa ki nongrim jong ka seng naba u sngewthuh ba kane ka seng ka dei ban im na ka bynta ka pateng jong ka jaitbynriew bad ka pateng ki khun ki kti,” ong u Bah Basaiawmoit.
U la kyntu ïa ki nongkyrshan ba kim dei ban shah pynbeij ha kito kiba ong ba ka VPP khlem u Dr. Ricky kan ym poi shuh shano shano naba kine ki dei tang ki nia kiba kwah ban pyntroiñ ïa ka seng.
“Ki nongkyrshan jong u Prah kim dei satia ban shah ïalam bakla ha kine ki buit jong kiwei pat ki party da kaba ong ba naduh bym don u Dr Ricky ka VPP ka la pher ne kam long shuh kum mynshwa,” ïathuh u Bah ardent da kaba kyntu ïa ki nongkyrshan ban long kiba husiar.