Balei pynshitom ïa ki Langrut, dei ka tnat Kam Pohïing ban shim jingkitkhlieh ba lum pisa be-aiñ ki pulit: VPP

Shillong, Risaw 11: Ka jinglap jong ka KSU ïa ki sem lum pisa beaiñ ba la kynnoh ba ki dei kiba la lum da ki pulit sha ki thaiñ Mawkhanu bad Thangshalai Mawryngkneng ka la pynlong ïa ka seng Voice of the People Party (VPP) ban pynrem jur ïa ka sorkar Meghalaya Democratic Alliance (MDA) bad ba u Myntri ka tnat ki Kam Pohïing ka sorkar jylla u dei ban shim ka jingkitkhlieh.
Halor kane ka jingjia, haba kren sha ki lad pathai khubor u nongïalam ka party VPP u Bah Ardent Miller Basaiawmoit ha ka sngi saitjaiñ u la kynthoh tyngeh ïa ka tnat Home Police kaba la khmih da u Symbud Myntri Rangbah ka jylla u Bah Prestone Tynsong halor kane ka jingjia ba la ïoh ring video da ka KSU ïa ki pulit ba ki lum pisa beain na ki trok ha ka surok kaba don ha ka thaiñ Mawkhanu bad Thangshalai.
“Halor kane ka jingjia u Myntri ka tnat ki Kam Pohïing ka sorkar jylla u dei ban shim ka jingkitkhlieh balei pynshitom ïa ki langrut ka tnat ki Kam Pohïing ka dei ban shim ka jingkitkhlieh halor kane ka kam bad kane ka jingjia kaba la pynlehraiñ ïa ka jylla,” ong u nongïalam ka VPP haba kren sha ki lad pathai khubor.
Ha kawei pat ka liang ka party VPP ka la pynrem jur ruh ïa ka jingbym lah ban shim khia jong ka sorkar ban tem ïa ka jingdawa jong ki nongsaid aiñ ka jylla kiba hapoh ka Shatri Shillong Bar Association kiba la ïakhih na ka por sha ka por ban dawa wengnoh mardor ia u Advocate General ka jylla u Amit Kumar halor kiba bun ki daw.
U Nongïalam ka VPP u la ong ba naduh ba sdang ka seng ka la donlang bad ki nongsaid aiñ kiba la pynsngew ïa ka jingdonkam bad jingdawa jong ki ban wengnoh ïa u Advocate General (AG) ka jylla u Amit Kumar halor kiba bun ki daw bad u la ong ba ka sorkar kadei ban sngap ïa ki jingdawa jong ki bad kumjuh ruh ban shong ïatai halor kane ka jingeh jong ki.
“Ka sorkar ka dei ban ïashong ïatai halor kane mat kaba shongnia kaba ki nongïasaid aiñ ka jylla kiba dei na ka Shillong Bar Association kiba la pynpaw bad dawa ba dei ban wengnoh mardor ïa u Advocate General ka jylla u Amit Kumar halor kiba bun kidaw bad lada kam lah ban leh eiei ruh kadei pat ban sngap ïa ki jingdawa jong ki bad halor kane ka VPP kumba ka la pynpaw naduh nyngkong ka ïai don ryngkat bad ki halor kane ka jingdawa ba shongnia jong ki,” ong u Bah Ardent Miller Basaiawmoit.