Sdang ka jingshalan ïa u shynrai Megha-1 jong ka Meghalaya sha Singapore, kaweh lama u President ka IFAD

Shillong, Risaw 11 : U mar rep ba kyrpang na ka jylla, u shynrai Megha-1, u la rung sha ka ïew jong ka pyrthei, hadien ba la plie paidbah ïa ka jingshalan mar thymmai sha Singapore ha ka sngi Thohdieng.
U President jong ka International Fund for Agricultural Development (IFAD), u Alvaro Lario, u la plie paidbah ïa ka jingshalan marbam sha shabar ri ha ka Eastern Ri-Bhoi Organic Farmer Producer Company Ltd PRIME Hub ha Bhoirymbong, Ri-Bhoi.
Ïa une u mar rep ba shalan la thung bad shalan shabar ri da ka Eastern Ri-Bhoi Organic Farmer Producer Company sha ka kompany kaba wanrah marbam, ka Veg Pro PTE Ltd, Singapore, hapoh ka kyrteng jong ka brand ba kynthup lang ïa ki mar jong ka sorkar jylla, kaba la tip kum ka ‘Meghalaya Collectives’.
Kane ka jingshalan sha shabar ri ka long ka jingmih na ka Meghalaya Livelihoods and Access to Markets Project (Megha-LAMP), kaba pyntreikam da ka Meghalaya Basin Management Agency (MBMA) ryngkat bad ka jingkyrshan jong ka IFAD.
Hapoh kane ka project, la ai jingkyrshan ïa ki kynhun ki nongrep da kaba pynbiang ïa ki tiar bad ki jaka pynkhreh mar, ki rukom ban peit ïa ka jinglong bad ka jingbha jong ki mar, bad ki jingïadei bad ki ïew, khnang ban pynkylla ïa ka kam rep kaba shalan ïa ki mar ba dang shu dep ban lum sha ka jingshalan ïa ki mar ba la pynbha bad pynkhreh bha sha ki ïew jong ka pyrthei.
Ha Bhoirymbong, la pynbiang ïa ka ERBOFPC da ki mashin ban pynrkhiang, ban tylliat bad ban song ïa ki mar ha ka rukom kaba khuid, lyngba ka rukom bei tyngka lang kaba kot sha ka USD 3.12 million. Kane ka la pynlah ïa kane ka kynhun ban pyndep ïa ki kyrdan jinglong bad jingbha jong ki mar kiba la buh da ki ïew jong ka pyrthei, la ong ki ophisar.
Ki ophisar ki la ong ba kane ka sienjam ka pyni ïa ka rukom treikam jong ka sorkar jylla ban pynkylla ïa ka kam rep jong ki nongrep kiba rep khyndiat, kaba mynshwa ka long tang na ka bynta ban pyndap ïa ki jingdonkam jong ka longïing, sha ka kam rep kaba pynleit jingmut ha ka kam khaii pateng bad ka jingshalan mar sha shabar ri. Kane ka thmu ruh ban pynduh ïa ki nongpyniaid hapdeng ki nongrep bad ki nongthied, khnang ba ki nongrep kin ïoh ïa ka jingïohnong kaba kham bha.
Ki la ong ruh ba ka platform Meghalaya Collectives ka thmu ban pynlong ïa ka Meghalaya kum ka jaka pdeng na ka bynta ki mar rep organic kiba rem dor, bad ban pyni ba ki Farmer Producer Organisations (FPOs) kiba long trai da ki paidbah ha ki shnong ki thaw ki lah ban ïakhun bad ïaryngkat kyrdan ha ki ïew jong ka pyrthei.