Shillong, Risaw 11: U Myntri Rangbah ka Jylla Conrad K. Sangma ha ka sngi Thohdieng u la ai ïa ki rukom treikam ba bha tam jong ka Jylla Meghalaya halor ka Early Childhood Development (ECD) Mission ha u Myntri Rangbahduh ka ri u Narendra Modi ha ka Departmental Summit on Women and Child Development ha New Delhi.
Ïa kane ka jingpyni lane ka presentation la pynlong ha ka jingiadon lang jong ka kynhun ba la jied kaba don 30 ngut ki briew ba kynthup ia ki myntri rangbah ka jylla, ki myntri sorkar pdeng bad ki heh ophisar jong ka sorkar India.Ia kane ka jingkren kaba 20 minit la pynlong na ka bynta ki jylla, halor ka “Ka jingpyrkhat biang ïa ki jaka Anganwadi na ka bynta ka jingai jingbam kaba kham bha bad ka jinghikai ba dang rit.”
La pyni ïa ka Meghalaya model na ka bynta ban leh kumjuh ha kiwei pat ki Jylla jong ka ri.
Haba pynpaw ïa ka jingdonkam jong ka jinglong khynnah rit, u Myntri Rangbah ka Jylla u la ong: “Kum u kpa, nga la iohi haduh katno u khun jong nga u jubab ïa man la ka khyllipmat jong ka por bad ka jingpyrkhat kaba nga ai ïa u, bad haduh katno u nangroi nangsan namar kata.Ka science ka iathuh ïa ngi balei, 80 percent na ka jabieng jong u khynnah ka nangroi ha ka 1,000 sngi ba nyngkong naduh ka sngi kha kaba ar.”
“Ki khynnah kiba kha mynta ka sngi kin long ki rangbah jong ka Viksit Bharat ha u snem 2047. Kaei kaba ngi leh ha kine ki 1,000 sngi ba nyngkong kan pynwan dur ba kumno kin long” u la ong.
U la ong ba ka jylla Meghalaya ka la sdang ïa ka Early Childhood Development Mission kaba la pyniasoh lang ïa baroh ki tnad pynroi briew bad ki jaka treikam jong ka imlang sahlang ban iarap ïa uwei pa uwei u khynnah ban poi sha ka sap kaba pura. U la ong ba ka rukom treikam jong ka jingim, “Ka Mission 1000 Days, ka trei ban pynkut noh ïa ka jingduna ha ka met ryngkat ka jingkyrshan ha man la ki kyrdan jong ka jingim ba dang rit”.
Haba pyntip sha u Myntri Rangbah duh ka ri shaphang ki bynta jong ka Mission 1000 Days, u Myntri Rangbah ka Jylla u la ong ba ha ka por ba pun khun, ki tnad ka Koit ka Khiah, ka Women and Child Development bad ka NRLM bad ka IIT Bombay, ha kaba ki longkmie ki nang ïa ki 45 tylli ki buit ai buin ha ka koit ka khiah.
U Myntri Rangbah ka Jylla u la pyntip ba ki longkmie kiba armet bad kiba dang ai buin bad ki khynnah haduh ar snem, kaba pynjlan haduh lai snem, ki ïoh ïa ki jingbam ba la shet ryngkat bad ki pylleng ha ki Anganwadi Centre arsien ha ka shi taiew, ha kaba ki Self-Help Groups ki ïarap ban weng ïa ka jingthut ha ka jingroi.Ïa kane la pyniasoh bad ka jingai jingmut ïa ki kpa man la u bnai.
U Myntri Rangbah ka Jylla ula pyntip ba ki Anganwadi Centre ki dang pynkylla sha ki jaka lehkmen, da ka kamra na ka bynta ka Creche ban kyrshan ïa ki longkmie.La sdang ruh ïa ka jingiarap ECD kaba shisnem na ka bynta ki samla kiba la pyndep ïa ka jingpule ha ka shnong, kiba shakri kum ki nonghikai ba la pyndap ha ka AWC bad kiba ioh ïa ka jingpynshisha jong ka NCVET, kaba plie lad ïa ki ha ka liang ka jingsumar.
