SPL 2026: 6 lak khur ka Mawlai ïa ka khusnam pisa

Shillong, Risaw 10: Ka lympung ïalehkai Shillong Premier League 2026 ka la poi sha kaba kut da ar tylli ki jingïalehkai ba khatduh ha ka sngi Saitjaiñ, ha kaba ka Lajong ka la pynkut da ka jingjop da 3-0 pyrshah ïa ka Rangdajied United FC, katba ka Langsning ka la ïakhaid bad ka Nongkseh.
Ka Mawlai, kaba la pynskhem ïa ka nam lahduh ha ka sngi Balang jong ka taïew ba ladep, ka la ïohpdiang ïa ka trophy ha ka jingïalang sam khusnam ha kaba kane ka kynhun kaba la jop mynta lai sien ïa ka khusnam ka la wanphai biang sha khlieh duh jong ka lympung SPL.
Kitei ki ar tylli ki jingïalehkai haka sngi Saitjaiñ ki la rai pynthikna ruh ïa ki kyrdan ba dei jong ki kynhun ha ka miej kheiñ point, ha kaba ka Shillong Lajong ka la pyndep ha ka kyrdan ba-ar (runners-up) hadien ba jop da 3-0 kol pyrshah ïa ka Rangdajied United-kaba pyndep ha ka kyrdan ba hynñiew. Nangta ka Nongkseh ka la ïakhaid bad ka Langsning, lahduh jong u snem 2025, ban pynkut ha ka kyrdan ba lai.
Katkum ka prokram, ka lahduh bad kaba wan ba-ar ha ka SPL kin rung beit beit sha ka semifinal jong ka SSA Super Cup, katba ka Nongkseh bad ka Langsning kin hap ban ïaid lyngba ka jingïalehkai playoffs ryngkat bad ka Meghalaya Police kaba wan ba san bad ka Sawmer kaba wan ba hynriew.
Kumjuh, baroh ar ka Mawlai bad ka SLFC kin ïashim bynta ruh ha ka SSA Champions Cup, ka ban sdang ha u bnai Naiwieng.
Kum ka lahduh, ka Mawlai ka la khur ïa ka khusnam pisa kaba Rs 6 lak, katba ka Lajong ka la ïohpdiang Rs 3 lak kum ka kynhun ba wan ba-ar. Kiba la ïadon ha ka jingïalang sam khusnam ki kynthup ïa u President ka SSA bah Banteidor Lyngdoh MLA bad kiwei kiwei ki dkhot ba kham rangbah jong ka synjuk, ha ryngkat u President ka Meghalaya Football Association bah Hamletson Dohling bad u coach jong ka kynhun ïalehkai phutbol ki shynrang ba la rangbah jong ka Meghalaya u Stanley Rozario.
Kumban shu kdew, ka SSA ka la lah ban pynbiang ïa ka khusnam pisa kaba heh tam lyngba ka jingkyrshan pisa jong ka sorkar Meghalaya.
Ha ka jingïalehkai ba nyngkong, ka Lajong ka la pynkhihjar lai sien ha ka kylla miet lyngba u Rimankhraw Kharumnuid (49’), u Banlamkupar Rynjah (74’) bad u Deibormame Tongper (90’+3P) hadien ka jingïakhun kaba khlem kol ha ka kylla step ban pynliem ïa ka RUFC.
Nangta ka jingïakhun kaba bud, ka Langsning bad ka Nongkseh ki la pynkut da kaba ïakhaid mar shi kol.
Ka Langsning ka la pynkhihjar nyngkong ha ka minit kaba 11 hadien ba u Samuel Phawa u la pyndei tiak ïa ka bol pashat na u Syed Ahmed kaba la ïaid napoh ki kjat jong u rangap dien ka Nongkseh u Mebankhraw Wahlang. Hadien nangta, ka jingbakla jong u Wallambok Dkhar (45’+2), uba la kum thep hi ïa ka bol sha kol ka la pynlong ïa ka Nongkseh ban ïoh pynkhaid.
Lah ban kdew ba ka mynsiem ïakhun jong ka SPL mynta u snem ka la long ha kawei pat ka kyrdan. Ka jingkiew kyrdan jong ka Nongkseh bad ka Meghalaya Police ka la pynthikna ba ki don katto katne tylli ki kynhun kiba lah ban rah ïa ka nam lahduh la jan haduh kaba kut jong ka league bad khlem artatien kane kan ïai bteng haduh ka Super Cup bad ka Champions Cup ka ban sa wan.