Nongstoiñ, Risaw 11: Ka surok na Nginïong sha Mawdoh ka dei kaba donkam haduh katta bad kaba ki paitbah nongshong shnong jong kitei ki thaiñ ki la angnud la slem bah, hynrei haduh mynta mynne ruh katei ka jingangnud jong ki kam shym pat la urlong satia.
Halor kane uwei na ki riew pawkhmat jong ka thaiñ Rambrai u ba ju shim bynta ruh ha ka bha ka miat jong ka imlang sahlang, u bah B.Nonglang sordar barim ka shnong Sawtalad (Mawdoh) haba ïakren bad u nongthoh khubor, u la ong ba ha ki snem ba mynshuwa na ka liang ki riew rangbah ka thaiñ ki la ju leit ban pynsngew sha ka sorkar lyngba ki ophisar ka tnad PWD.
Ki la pyrshang ruh ban leit peit ïa ka phang kaba biang jong ki jaka na ka bynta ban shna surok, hynrei ka la shu kut noh kumto khlem lah ban pynthikna la ka sorkar kan buh ne em ïa ka mang pisa na ka bynta ban shna ïa katei ka surok.
Hynrei, u la ong ruh ba lada shna surok na Nginïong sha Mawdoh, ki don ki bynta kiba hap ha ka jingpeit jong ka tnad treikam kaba don ha Nongkasen. Ka don ruh ka bynta kaba hap ha ka jingpeit jong ka Nongstoiñ Division. Na ka bynta ban shna ïa katei ka surok kitei ki tnad treikam, ki hap ban ïa sngewthuh jingmut lang na ka bynta ban pynbeit ïa baroh ki jingdonkam.
U la kren shai ruh ba lada ka don ka surok na Mawdoh sha Nginïong, kan pynsuk shibun ïa ki nongleit nongwan khamtam ki paitbah kiba donkam ban leit sha ki thaiñ Mawlangsu lane kiba donkam ban leit sha Shillong. Namar ka surok na Mawlangsu shaduh Markasa ka la bit la biang ba ki kali kin ïaid. U la ong ruh ba ka jingjngai tang na Mawdoh haduh Rambrai ka ïa ryngkat bad ka jingjngai na Mawdoh sha Mawphanlur.
Ha kajuh ka por u la ong ba ki paidbah nongshong shnong katei ka thaiñ, ki dei kiba khlaiñ bha ha ka rep soh, rep pai, rep jhur bad kiwei kiwei nangta ki riew tymmen ka thaiñ Madoh ki dei kiba tbit bha ha ka thaiñ shylliah, thaiñ prah thaiñ shang. Kumta lada don ka surok kan long ka jingkyrkhu kaba khraw ïa ki paitbah ka thaiñ baroh kawei.
