Plie u Myntri ïaka ‘Amlarem Football League 2026-27’ jong ki 4 tylli ki Division

Jowai, Risaw 11: Ka Amlarem Sub-Divisional Sports Association (ASSA), ha ryngkat ka jingïatreilang bad ka ophis Sub-Divisional Officer (Civil), Amlarem Sub-Division, hynnin ka sngi saitjaiñ kila plie pyrda ïa ‘Amlarem Football League 2026-27’ ha madan ASSA Mini Stadium, Ladjaplem, shi bynta na ka jingrakhe ïaka jingdap 50 snem ne ka ‘Golden Jubilee celebration’ jong ka Amlarem Sub-Division.
Ha kane ka sngi la wan ban donlang da u bah Lahkmen Rymbui, Myntri ka Sorkar jylla kum u kongsan, ka kong Vevotolu Kezo, IAS, Sub-Divisional Officer (Civil), Amlarem Sub-Division kum ka symbud kongsan, ki nongkitkam ka ASSA katba ïa ka jingïalang la pynïaid da u Kampher Pohlong, President of ASSA.
Ban pynkiew ïaka kam ïalehkai Sports hapoh ka thaiñ u ma Rymbui ula pynsngew ka jingpynthymmai ïaka Indoor Stadium ha Ladjaplem la dep ban mang pisa haduh 55 lak tyngka.
Shi bynta ban ban kyrshan pisa ïa kane ka lympung u kongsan ula pynpna ïa ka song pisa ïa ki saw tylli ki Division kiba long kumne: haka Super Division, ka nongjop Champion kan ïoh 1 lak tyngka, runners-up 60,000. Haka First Division, ka lahduh- 60,000 bad runners-up 40,000. Haka Second Division, ka Champions -30,000 bad runners-up 20,000, katba haka Third Division, ka Champions- 25,000 bad runners-up 15,000.
Ki lympung ka Amlarem Football League 2026–27 kin don haduh 92 tylli ki kynhun ki ban ïashim bynta ba la kynthup lang ïa baroh saw tylli ki Divisions. Haka Third Division ki don 36 tylli, haka Second Division 28 tylli, haka First Division 20 tylli bad haka Super Division ki don 8 tylli.
Haka sngi sdang jong ka jingïakhun ‘Super Division’ mynta ka sngi hadpeng ka Lamin XI SCC bad ka Amlarem Social Club, kila poi sha ka jingïakhaid khlem don kiba ïoh ban thep kol.
La pynshongshit shuh shuh ïa kane ka sngi plie daka jingshad tynrai bala shim bynta da ka kynhun na Umladkhur bad ka jingrwai na ka samla Enis Lamin.