Nongstoiñ, Risaw 10 : U MLA ba don burom jong ka Nongstoiñ Constituency u Bah Gabriel Wahlang, haba ai jingkren kum u kongsan ha ka sngi jong ka jingkynjoh shi snem jong ka ‘Kyrshan ïa ka Lawei CLF Multipurpose Co operative Society Ltd’ kaba la long ha ka sngi palei, u la ïaroh bad ai khublei kyrpang ïa ki longkmie, kiba la trei shitom shisha bad aiti ïalade na ka bynta ban kiew shakhmat.
U la ong ba haba ki longkmie ki shimkhia bad shim ka jingkitkkhlieh bad trei shitom baroh ki kam ki urlong beit. U la ong ruh ba ka shong eh ruh ha ki longkmie ba kan shimkhia ïa ka kam bad ban kit ïa ka lyngkor, namar ka longkmie ki lah ban pynbha ïa la ki ïing ki sem ne ban pynpra ruh kumjuh. Na ka liang jong u, u la ai mynsiem ba kin nang ïaid shaphrang ha ki jingthmu ban pynbha shuh shuh na ka bynta ka imlang sahlang lyngba kane ka Society.
Na ka liang ka ‘Kyrshan ïa ka Lawei CLF Multipurpose Co operative Society Ltd’, ka la ïoh ban rakhe ïa ka 1st Annual General Meeting lane ka jingkynjoh ka kynhun sha u mawmer ba shi snem ka CLF, ïa kaba la ïoh ban pynlong ha ka shnong Siejlieh Nongstoiñ West Khasi Hills District.
Lah ban kdew hangne ba katei ka Cluster Level Federation (CLF), ka dei kawei na ki kynhun kaba khmih ïa ki Village Organisation kiba don ha ki shnong bapher bapher kiba ha ka thaiñ Nongstoiñ. Katba ka Village Organisation pat ka dei kaba khmih ïa ki Self Help Group, kiba dei ruh ki seng kiba ju tur ha man la ki kyndong kynshrot jong ki shnong ki thaw ban ai mynsiem, ban kyrshan ne kner ïa la ki kti sha ki longïing kiba hap ha ki lanot bapher bapher la ha ka shitom ka pang ne ha ka ïoh ka kot.
Ha katei ka sngi u kongsan u la ïoh ban sam ïa ki khusnam sha ki Vo kiba la man bha ha ki kam jong ki. U la ïoh ruh ban khap ïa u ribbon ban plie paidbah ïa ki tiar kiba lah ban pyndonkam ha ka rep ka riang, kiba la ai lyngba ka Livelihood Service Society hapoh ka jingïalam ka Dr.Dasiewdor Sancley DFS Livelihood Promotion Farm kaba dei jong ka MSRLS and Prasari lyngba ka Project jong ka MKSP IFC jong ka ophis MSRLS.
Ha kane ka sngi ba kyrpang, nalor u Bah Gabriel Wahlang MLA ka Nongstoiñ Constituency kum u kongsan, la don ryngkat ruh u bah P. Ïawphniaw sordar ka shnong Siejlieh Nongstoiñ, ka kong Devine Tympuiñ President ka CLF bad kiwei kiwei ki ophisar sorkar.
